Qazaqstanda agroónerkásip keshenin qarjylandyrý eki ese artty

ASTANA. QazAqparat - Bıyl agroónerkásip kesheninde qarjylandyrý eki ese artty. Bul týraly Senattyń jalpy otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Bıyl agroónerkásip kesheninde qarjylandyrýdy eki esege arttyrdyq. Sonyń nátıjesinde, 10 aıdyń qorytyndysy boıynsha agroónerkásip keshenindegi naqty kórsetkish boıynsha 8 paıyz ósim bolǵanyn kórip otyrmyz», — dedi Álıhan Smaıylov.

Úkimet basshysy aýyl sharýashylyǵyna salynǵan ınvestıtsııa naqty mánde 7,5 paıyzǵa óskenin aıtty.

«Orta merzimdi perspektıvada biz agroónerkásip kesheninde jalpy somasy 2,5 trln teńgeni quraıtyn 560 jobany júzege asyrýdy josparlap otyrmyz. Olar r azyq-túlik qaýipsizdigin qamtamasyz etýge baǵyttalatyn bolady», - dedi Premer-Mınıstr.

Budan buryn habarlanǵandaı, Á. Smaıylov jańa jobalardy júzege asyrý ónerkásip óniminiń kólemin 10,5 trln teńgege arttyrýǵa múmkindik beretinin aıtty. Shamamen 4,4 trıllıon teńgege ımportty almastyrý júrgiziledi jáne 6,1 trln teńgege eksport kólemi ósedi.