Qazaqstanda agroóndiristiń jańa modeli: fermerler jasymyq jetkizýge kelisti
ASTANA. KAZINFORM — Aqmola oblysy men Soltústik Qazaqstan oblysynyń fermerleri Azyq-túlik kelisimshart korporatsııasyna jasymyq jetkizý boıynsha kelisimsharttar jasasty. Bul týraly AShM baspasóz qyzmeti málim etti.
Qazaqstanda agroóndiristiń jańa úlgisi qalyptasyp keledi. Máselen, Aqmola jáne Soltústik Qazaqstan oblystarynyń fermerleri «Azyq-túlik kelisimshart korporatsııasy» aktsıonerlik qoǵamymen jasymyq ósirý jáne jetkizý baǵytynda uzaq merzimdi kelisimsharttar jasasty. Bul bastama BUU Damý baǵdarlamasymen birlesken joba aıasynda júzege asyrylyp jatyr jáne ekologııalyq taza eginshilik tásilderin engizýge, sondaı-aq tozǵan jerlerdi qalpyna keltirýge arnalǵan.
Qazaqstandaǵy joba Aýyl sharýashylyǵy mınıstrliginiń qatysýymen jáne Jahandyq ekologııalyq qordyń qoldaýymen iske asyrylady.
Bıyl Soltústik Qazaqstan ekojúıelerin saqtaý jáne turaqty agroóndiris ádisterin damytýǵa baǵyttalǵan baǵdarlamaǵa qatysatyn aýyl sharýashylyǵy óndirýshilerin irikteý bastaldy. Alǵashqy qatysýshylar anyqtalyp, bes sharýashylyqpen pılottyq kelisimsharttar jasaldy.
Jobanyń negizgi quraly — jasymyqty forvardtyq satyp alý tetigi.
Korporatsııanyń málimetinshe, bul tetip dástúrli qarjylandyrý sheńberi, ıaǵnı, ol fermerlerdi aınalym qarajatymen qamtamasyz etip qana qoımaı, halyqaralyq baǵdarlama aıasynda ekologııalyq turaqty tájirıbelerdi engizýdi yntalandyrady. Bul óz kezeginde aýyl sharýashylyǵy jerleriniń tozýyn azaıtyp, resýrstardy tıimdi paıdalanýǵa múmkindik beredi.
— Baǵdarlama tek qarjylaı qoldaýmen shektelmeıdi, sonymen qatar sharýashylyqtardy keshendi súıemeldeýdi kózdeıdi. Qatysýshylar ǵylymı saraptamaǵa, zamanaýı agrotehnologııalardy qoldaný boıynsha keńesterge, sondaı-aq ekologııalyq táýekelderdi baǵalaý jáne basqarý quraldaryna qol jetkizedi, — delingen habarlamada.
Alǵashqy kezeńde joba Soltústik Qazaqstan jáne Aqmola oblystaryn qamtıdy. Jasymyq jetkizý kólemi 2,5 myń tonnany quraıdy.
Keleshekte jer jáne sý resýrstaryn uqypty basqarýdyń tıimdi tájirıbelerin basqa óńirlerge taratý josparlanyp otyr.
Sonymen qatar, Korporatsııa agrarshylardy qoldaýdyń qosymsha tetikterin damytýdy jalǵastyrýda. Atap aıtqanda, taýarlyq nesıeleý tetigi jáne kópjyldyq mal azyqtyq daqyldardy (onyń ishinde jońyshqany) úshjaqty forvardtyq satyp alý júıesi pysyqtalýda. Bul baǵyt mal sharýashylyǵynyń jemshóp bazasyn nyǵaıtyp, egis alqaptaryn ártaraptandyrýǵa yqpal etedi.
Sarapshylardyń aıtýynsha, mundaı bastamalar Qazaqstan agrobıznesiniń jańa damý núktelerin qalyptastyrady. Balamaly jáne mal azyqtyq daqyldar naryǵyn damytý, sondaı-aq uzaq merzimdi kelisimsharttyq tetikterdi engizý salanyń básekege qabilettiligin arttyryp, aýyl sharýashylyǵyn ekologııalyq turǵydan turaqty modelge kóshirýge negiz qalaıdy.
Aıta keteıik, 11 óńirde aýyl sharýashylyǵy daqyldaryn saqtandyrý baǵdarlamasy júzege asyrylyp jatyr.
