Qazaqstanda agrohımııaǵa sýbsıdııa bólý qaıta qaraldy
Bul jaıynda Ortalyq kommýnıkatsııalar qyzmetindegi brıfıngte QR Aýyl sharýashylyǵy mınıstrligi Ósimdik sharýashylyǵy ónimderin óndirý jáne qaıda óńdeý departamentiniń dırektory Ajar Qajybekova málim etti, dep habarlaıdy QazAqparat.
«Bizde agrohımııany damytý úshin tyńaıtqyshtar men gerbıtsıdterge sýbsıdııa berilip kelgen edi. Biraq, bizde tyńaıtqysh bylaı sýbsıdııalanatyn: eger biz tyńaıtqyshty otandyq óndirýshiden satyp alsaq, onda sýbsıdııa 50 paıyz kóleminde, al eger tyńaıtqysh ımporttyq óndirýshiden alynsa, sýbsıdııany 30 paıyz kóleminde tóleıtinbiz. Aýyl sharýashylyǵy taýaryn óndirýshilerdi sapaly, jaqsy tyńaıtqyshtar men pestıtsıdterdi paıdalanýǵa yntalandyrý úshin paıyzdyq emes absolıýttik mánde sýbsıdııalaý týraly sheshim qabyldandy», - dedi departament basshysy.
Onyń aıtýynsha, endigi ýaqytta agrarıı otandyq nemese sheteldik óndirýshiniń tyńaıtqyshyn satyp alǵandyǵynda eshqandaı aıyrmashylyq bolmaıdy.
«Aýyl sharýashylyǵy taýaryn óndirýshiler belgili bir tyńaıtqyshty satyp alǵan kezde qandaı sýbsıdııa jáne qandaı kólemde alatyndyǵyn biletin bolady. Importtyq nemese otandyq prıntsıpi boıynsha jikteý bolmaıdy. Máselen, quramynda azoty bar tyńaıtqysh bolsa onda ımporttyq nemese otandyq ekendigine qaramastan sýbsıdııalaýdyń biryńǵaı normatıvin alady. Sýbsıdııa normatıvi Aýyl sharýashylyǵy mınıstrliginiń buıryǵymen bekitiledi», - dedi Qajybekova.