Qazaqstanda agrarlyq ǵylymdy qarjylandyrý kólemi 2,3 ese ulǵaıdy
«Búgingi tańda álemdegi fermerlerdiń edáýir bóligi bilimniń jetispeýshiliginen kúırep barady. Bul oqyp, biliktiligin arttyrý múmkindiginiń joqtyǵyna da, jalpy agrarlyq ǵylymnyń damýyna da qatysty oryn alýda. Osy túıtkildi máselelerdi sheshý úshin respýblıkamyzda agroónerkásiptik keshen sýbektileri úshin bilim taratý boıynsha qyzmet kórsetý tásildemeleri qaıta qaraldy. Osy maqsatta Ulttyq agrarlyq ǵylymı-bilim berý ortalyǵy enshiles uıymdarynyń qurylymy ózgerdi. Qazir ortalyqty halyqaralyq standarttar talaptaryna sáıkes keltirý, bıznestiń qajettiligine baǵdarlaý jumystary júrgizilýde. Ǵylymı-zertteý ınstıtýttarynyń, tájirıbelik stantsııalardyń, tájirıbelik-óndiristik sharýashylyqtardyń bazasynda 22 bilim taratý ortalyǵy quryldy. Sondaı-aq turaqty jumys isteıtin konsýltatsııalyq ortalyqtar uıymdastyrylady», - dedi Saparhan Omarov OKQ-da ótken baspasóz máslıhatynda.
Onyń aıtýynsha, agrarlyq ǵylymdy qarjylandyrý kóleminiń jetkilikti bolýy qamtamasyz etiledi.
Máselen, bıyl Úkimet janyndaǵy Joǵary ǵylymı-tehnıkalyq komıssııa baǵdarlamalyq-nysanaly qarjylandyrý boıynsha aldaǵy 3 jylǵa 50,4 mlrd teńge somasyndaǵy jalpy qarjylandyrý kólemin maquldaǵan. Bul aldyńǵy úsh jyldyq kezeńmen (21,7 mlrd. teńge) salystyrǵanda 2,3 ese kóp.
Bul qarajatqa zertteýdiń 10 basym baǵyty (ósimdik sharýashylyǵy, mal sharýashylyǵy, veterınarııa, aýyl sharýashylyǵy shıkizatyn óńdeý jáne basqa) boıynsha 36 ǵylymı-tehnıkalyq baǵdarlama ázirleý josparlanǵan.
«Bıznestiń otandyq ǵylymı zertteýlerge degen suranysyn qamtamasyz etý, kásibı kadr tapshylyǵy problemasyn sheshý úshin barlyq qajetti normatıvtik-quqyqtyq negiz jasaldy. Mysaly, eki iri agrarlyq joǵarǵy oqý orny – Qazaq ulttyq agrarlyq ýnıversıteti men S. Seıfýllın atyndaǵy Qazaq agrotehnıkalyq ýnıversıteti zertteý ýnıversıteti mártebesine ıe boldy. Bul baǵyttaǵy jumys jalǵasady», - dedi ol.
