Qazaqstanda aǵyndy sýlar arqyly esirtkiniń taralý deńgeıi zerttelip jatyr
ASTANA. KAZINFORM – Qazaqstanda aǵyndy sýlar arqyly esirtkiniń taralý deńgeıin anyqtaýǵa baǵyttalǵan hımııalyq-toksıkologııalyq zertteýler turaqty túrde júrgiziledi. Bul týraly OKQ-da ótken baspasóz konferentsııasynda Ádilet mınıstrligi Sot saraptamalary ortalyǵynyń dırektory Baqytjan Baıtılesov málim etti.
Onyń aıtýynsha, QR Bas prokýratýrasynyń tapsyrmasy boıynsha 2024 jyly alǵash ret aǵyndy sýlarǵa keshendi zertteý júrgizilgen. Zertteý barysynda oıyn-saýyq oryndary men bilim berý mekemelerin qosa alǵanda, 18 nysannan synama alynǵan.
– Aǵyndy sýlardy zertteý nátıjesinde keıbir úlgilerden psıhoaktıvti jáne psıhotroptyq zattar, sondaı-aq «dızaınerlik esirtkiler» – mefedron, alfa-PVP, amfetamın jáne spaıs túrleri anyqtaldy. Bul zertteýler qoldanylǵan ádistemeniń tıimdiligin jáne onyń elimizdegi esirtki ahýalyn baqylaýdaǵy mańyzyn kórsetti, - dedi ol.
Baqytjan Baıtılesovtiń málimetinshe, zertteýlerdi júrgizý úshin joǵary tıimdi suıyqtyq hromatograftary satyp alynǵan. Qymbat turatyn zerthanalyq qural-jabdyqtarmen elimizdiń 8 aýmaqtyq bólimshesi qamtamasyz etilgen.
Qazirgi ýaqytta aǵyndy sýlardy zertteý Astana qalasymen qatar Almaty, Shymkent, Qaraǵandy, Pavlodar, Mańǵystaý, Aqtóbe jáne Jambyl oblystarynda júrgizilip jatyr.
– Bıyl aqpan aıynda aǵyndy sýlarǵa hımııalyq-toksıkologııalyq saraptama júrgizý ádistemesi resmı túrde memlekettik tizilimge engizildi. Endi bul saraptama turaqty negizde júrgiziledi, - dedi ortalyq dırektory.
Ol sondaı-aq zertteý nátıjeleri quqyq qorǵaý organdarynyń qaýlylary negizinde saraptama júrgizýge paıdalanylatynyn atap ótti.
– Biz saraptamalardy quqyq qorǵaý organdarynyń qaýlysy negizinde ǵana júrgizemiz. Alaıda naqty nátıjelerdi jarııalaı almaımyz. Óıtkeni Qylmystyq kodekstiń 201-babyna sáıkes, tergeý derekterin jarııa etýge tyıym salynǵan, - dedi Baqytjan Baıtılesov.
Aıta keteıik, júrgizilgen zertteýlerdiń nátıjeleri 2025 jylǵy 3-4 qarashada Frantsııanyń Nıtstsa qalasynda ótken halyqaralyq konferentsııa materıaldarynda jarııalanǵan. Sonymen qatar, bul jumys reseılik ǵalymdar tarapynan da joǵary baǵalanǵan.
Buǵan deıin habarlaǵanymyzdaı, Qazaqstanda densaýlyqqa qaýipti azot totyǵynyń zańsyz aınalymyna qarsy baqylaý kúsheıtiledi.
