Qazaqstanda aǵash materıaldaryn tańbalaý júıesi iske qosylmaq

ASTANA. KAZINFORM - Atalmysh shara aǵashtyń kóleńkeli aınalymyn tolyqtaı joıýǵa múmkindik beredi, dep habarlaıdy QR Ekologııa jáne tabıǵı resýrstar mınıstrliginiń baspasóz qyzmeti.

Mınıstrliktiń baspasós qyzmetiniń málimetterine qaraǵanda, qazirgi ýaqytta elde memlekettik orman qory aýmaǵyn qashyqtan zondtaý tehnologııalary belsendi túrde qoldanylyp keledi, bul ormandy zańsyz kesý jaǵdaılarynyń qysqarýyna múmkindik berdi (2010 j. – 664 jaǵdaı, 2015 j. – 522 jaǵdaı, 2020 j. – 386 jaǵdaı, 2025 j. – 197 jaǵdaı).

Sonymen qatar, elde ormandardy zańsyz kesýdi túbegeıli joıý jáne aǵash materıaldaryn kóleńkeli aınalymnan shyǵarý máselesi áli de ózekti bolyp otyr.

- Osy maqsatta Qazaqstan Respýblıkasy Ekologııa jáne tabıǵı resýrstar mınıstrligi aǵash materıaldaryn elektrondyq tańbalaý boıynsha halyqaralyq tájirıbeni zerttedi, ol, atap aıtqanda, belarýs áriptesterge aǵashtyń kóleńkeli aınalymyn tolyqtaı joıýǵa múmkindik bergen.

Zertteý qorytyndylary boıynsha «Qazaqtelekom» AQ-men birlesip, eldegi aǵash materıaldarynyń aınalymyn tańbalaý jáne qadaǵalaý jónindegi ulttyq júıeni ázirleý bastaldy, - delingen habarlamada.

Sondaı-aq onda 2025 jylǵy 29 jeltoqsanda «Semeı ormany» memlekettik orman tabıǵı rezervaty aýmaǵynda iske asyrylǵan pılottyq jobanyń nátıjeleri talqylanǵany aıtylady. 

Qatysýshylar aǵash materıaldarynyń qadaǵalanýyn qamtamasyz etýdiń qoldanystaǵy tetikterin, olardy odan ári jetildirý jónindegi usynystardy, sondaı-aq retteýshilik áserdi taldaýdy júrgizýdiń negizgi aspektilerin qarastyryp, pılottyq júıeni aýqymdaý jáne aǵashty tańbalaýdy búkil el aýmaǵynda kezeń-kezeńimen engizýdi usyndy.

Osylaısha, atalǵan júıeni memlekettik orman qorynyń búkil aýmaǵynda engizý aǵashtyń zańsyz aınalymyna qarsy is-qımyl jasaýda, ashyqtyqty arttyrýda jáne orman resýrstaryn utymdy paıdalanýdy qamtamasyz etýde mańyzdy qadam bolmaq.

Osyǵan deıin el aýmaǵynan aǵash materıaldarynyń keıbir túrlerin áketýge tyıym salynǵany týraly habarlandy.