Qazaqstanda AES-tyń ІІІ nemese ІІІ+ býyndaryn salý múmkindikteri qarastyrylýda - Qaırat Qadyrjanov
ALMATY. 21 qyrkúıek. QazAqparat /Erlik Erjanuly/ - Atom elektr stansasyn salýda reaktor ornatýdy tańdaý ólshengen sheshimdi qajet etedi. Bul Almatyda ótip jatqan «ıAdrolyq jáne radıatsııalyq fızıka» dep atalatyn VIII halyqaralyq konferentsııada aıtyldy.
«29-maýsymda Úkimet qaýlysymen «Qazaqstannyń 2011-2020 jyldardaǵy atom salasyn damytý baǵdarlamasy» maquldandy. Onyń basty maqsaty - atom salasyn odan ary damytý jáne uzaq merzimdi keleshekte eldiń energetıkalyq qaýipsizdigin qamtamasyz etý úshin atom energetıkasynyń negizin qalaý. Baǵdarlamadaǵy sharalardy júzege asyrý - atom energetıkasyn, atom energetıkasynyń negizi men atom salasyndaǵy ǵylymdy damytýǵa jáne halyq densaýlyǵy men qorshaǵan ortany qorǵaý mindetterin sheshýge múmkindik beredi», - deıdi QR Ulttyq ıadrolyq ortalyǵynyń Bas dırektory Qaırat Qadyrjanov.
Onyń aıtýynsha, bul baǵdarlamada Qazaqstanda atom elektr stantsııalarynyń ІІІ nemese ІІІ+ býyndaryn salý múmkindikteri qarastyrylýda. Onda reaktorlardy ornatýda qaýipsizdikti qamtamasyz etý turǵysynan jáne jobadaǵy tótenshe jaǵdaılardyń týyndaýyn barynsha boldyrmaýda ólshengen sheshimder qajet. Atom energetıkasynyń qaýipsiz damýy ıadrolyq tehnologııany damytýǵa jáne álemdegi Qazaqstannyń básekelestik mártebesin kóterýde ǵylymı, tehnologııalyq jáne kadrlyq bazany jetildirýge negiz qurýǵa múmkindik beredi.
«Energetıkanyń bolashaǵy búkil álemde atom enegertıkasymen, sýtegi energetıkasy jáne jel energııasy, álemdik muhıttar men kún sııaqty basqa da dástúrli emes kózdermen baılanystyrylady. Qazirgi tańda dástúrli emes energetıka kózderi dástúrli energııa kózderin almastyratyn iri kólemdegi energotehnologııalar retinde qarastyrylyp jatqanyn atap ótý kerek. Álem ǵalymdary 50 jyldan astam ýaqyttan beri termoıadrolyq sıntezdi basqarý máselesin sheshýde. Bul saladaǵy zertteýler áli aıaqtalýdan alys. Adamzat úshin bolashaqta energııa alýda atom energetıkasyn qoldanýdan basqa balama joq», - dedi Q. Kamaluly.
