Qazaqstanda AES-tiń radıoaktıvti qaldyqtary qaıda jóneltiledi
ASTANA. KAZINFORM — QR Atom energııasy jónindegi agenttigi tóraǵasynyń orynbasary Áset Mahambetov AES-tiń paıdalanylǵan otyn elementterin kádege jaratýǵa qatysty pikir aıtty.
Onyń sózine qaraǵanda, bul máselege qatysty aldaǵy ýaqytta naqty sheshim jasaý kerek.
— Bul másele áli túpkilikti sheshimin tapqan joq. Zań jobasynda qaldyqtardy kómý oryndary qarastyrylǵan. Paıdalanylǵan ıadrolyq otynǵa qatysty álemdik tájirıbeni zerttep jatyrmyz, óıtkeni osyǵan qatysty quqyqtyq tájirıbe shetelde ártúrli qoldanylyp júr. Mysaly, Fınlıandııada tereń bıologııalyq qoımalar salynyp jatyr. AQSh-ta ıadrolyq reaktorlardyń kóptigine qaramastan, paıdalanylǵan ıadrolyq otyn áli de stantsııalardyń janynda, atom elektr stantsııalarynyń aýmaǵynda saqtalady. ıAdrolyq reaktor jumys istegen kezde, ýrannyń bári janyp ketpeıdi. Ony tereń óńdese, qaıta paıdalanýǵa múmkindik bar, — dedi Áset Mahambetov Parlament Májilisinde tilshiler suraǵyna jaýap bere otyryp.
Aıta keteıik, búgin Parlament Májilisiniń jalpy otyrysynda «Radıoaktıvti qaldyqtarmen jumys isteý týraly» zań jobasy men ilispe eki qujat birinshi oqylymda maquldandy. Osy oraıda elde radıoaktıvti qaldyqtarmen jumys isteý jónindegi Ulttyq operator ınstıtýtyn qurý eskerilgen.
