Qazaqstanda AES-terge arnalǵan ýrannyń strategııalyq qory qurylady

ASTANA. KAZINFORM – Qazaqstanda AES-terge arnalǵan ýrannyń strategııalyq qory qurylady. Ýran baıytylmaıdy, ıaǵnı ken kúıinde saqtalady. Energetıka mınıstrliginiń Kazinform saýalyna joldaǵan jaýabynda osyndaı málimet aıtylǵan.

- Qazaqstan ýran óndirý boıynsha álemde birinshi orynda (40%) jáne onyń jer qoınaýynda barlyq barlanǵan álemdik qorlardyń ýran qorynyń 14%-y shoǵyrlanǵan. Sondaı-aq Qazaqstanda daıyn ıadrolyq otyn óndirisi bar. AES qurylysy Qazaqstanǵa óziniń ýran resýrsyn ishki energııamen jabdyqtaý úshin paıdalanýǵa múmkindik beredi. Qazaqstandaǵy AES-ter úshin ýrannyń strategııalyq qorlary qurylady, - delingen resmı jaýapta.

Eske salsaq, Prezıdent Qasym-Jomart Toqaev Býrabaıdaǵy Ulttyq quryltaıda Qazaqstanǵa úsh atom elektr stansasyn salý kerektigin aıtqan bolatyn. Ekinshi jáne úshinshi AES oryn tebetin óńirdi anyqtaý úshin eldiń energetıkalyq júıesi tereń taldaýdan ótý kerek.

- Ekinshi jáne úshinshi AES-ti salýǵa áleýetti aýdandardy anyqtaý úshin óńirlerge elektr energııasyna boljamdy qajettilikter, ekonomıkalyq ósý qarqyny, demografııalyq dınamıka jáne t.b. taldaýlar júrgiziledi.

Qazaqstanda qýat kózine degen suranys jyl saıyn artyp keledi. Kóptegen JEO eski jáne qatty tozǵandyqtan, uzaq ýaqyt boıy óz múmkindikteriniń sheginde jumys isteıdi. Olar qoldanystaǵy qýatty aıtarlyqtaı arttyrý máselesin sheshpeıdi. Elektr energııasynyń tapshylyǵyn AES salý arqyly jabýǵa bolady, - dep jazady vedomstvo mamandary.

Sondaı-aq Prezıdent ıAdrolyq energetıka agenttigin qurýdy tapsyrǵan bolatyn. Onyń tóraǵasy bolyp Almasadam Sátqalıev taǵaıyndaldy.