Qazaqstanda AES-ten shyǵatyn radıoaktıvti qaldyqtar qalaı retteledi

ASTANA. KAZINFORM — Elimizde bolashaqta salynatyn atom elektr stansalarynan shyǵatyn radıoaktıvti qaldyqtardyń taǵdyry ne bolady? Bul saýaldy Ekologııa jáne tabıǵı resýrstar vıtse-mınıstri Jomart Álıevke qoıǵan edik. 

— Radıoaktıvti qaldyqtar máselesi Ekologııalyq kodekspen rettelmeıdi, bul baǵytty retteıtin jeke zań bar. Atom energetıkasy jónindegi agenttigi qurylýyna baılanysty, olar qurylys pen paıdalanýdan bastap búkil tsıkl úshin tolyq jaýapty, sondyqtan atalǵan máseleni agenttik retteıdi, — dep qysqa qaıyrdy Jomart Álıev Astanada ótken IX eýrazııalyq bıznes forýmda agenttik tilshisiniń saýalyna jaýap bere turyp.

Degenmen vıtse-mınıstr atom elektr stansasy qyzmetinde ekologııalyq kodekstiń talaptary nazardan tys qalmaıtynyn aıtyp otyr.

— Radıoaktıvti qaldyqtarmen jumys isteý máselesi kez kelgen jaǵdaıda memlekettik ekologııalyq saraptamadan ótedi jáne ulttyq zańnama men MAGATE-niń barlyq talaby eskeriledi. Óıtkeni, atom energetıkasyna qatysty barlyq másele, sol talaptarmen baılanysty, — dep tolyqtyrdy mınıstrdiń orynbasary.

Eske salaıyq, elimizde salynatyn birinshi atom elektr stansasy tolyǵymen ulttyq baqylaýda bolady. 

Sondaı-aq AES-ten óndiriletin elektr energııasynyń quny JEO men JES-ten alynatyn elektr energııasyna qaraǵanda joǵary bolady. 

Odan bólek, Qazaqstannyń bolashaq atom elektr stansalaryna qajet mamandardy qaı elder daıarlap jatqany týraly jazdyq.