Qazaqstanda AES salmaı-aq, ýranǵa elektr energııasyn aıyrbastaýǵa bolmaı ma – Mınıstrlik jaýap berdi

NUR-SULTAN. QazAqparat – Qazaqstan óz aýmaǵynda AES salmaı-aq, osyndaı jobany qolǵa alǵan kórshi elderge ıadrolyq otyn satý arqyly qajetti energııany barterlik negizde alýǵa bolmaı ma? QR Energetıka mınıstrliginiń mamandaryna Ortalyq kommýnıkatsııalar qyzmetinde ótken brıfıngide osyndaı suraq qoıyldy, dep habarlaıdy QazAqparat tilshisi.

Energetıka mınıstrligi elektr energetıkasyn damý departamentiniń dırektory Aıdos Dáribaevtyń sózine qaraǵanda, mundaı barterlik kelisim Qazaqstanǵa elektr tapshylyǵy bolmaıdy degen kepildik bere almaıdy.

«Biz elektr energııasyn ımporttaıtyn bolsaq, táýeldilikke tap bolamyz. Bizdiń ulttyq qaýipsizdigimizge zııany tıedi. Biz 2035 jylǵa deıingi energetıkalyq teńgerim tujyrymdamasyn daıyndaǵan kezde ózimizdiń ekonomıkamyzdyń qajettiligin tolyq qamtamasyz etý úshin qansha qýat kózin salý kerektigin belgiledik. Sol múmkindikke jetkizý úshin jumys isteımiz. Óıtkeni ár túrli jaǵdaılar bolýy múmkin. Qazaqstan Respýblıkasy óz aldyna jumys isteıtin ýaqyt bolsa, ózimiz tutynatyn energııany tolyǵymen ózimiz óndirýimiz kerek», - dedi maman.

Al atom energetıkasy jáne ónerkásibi departamentiniń dırektory Jaslan Qasenovtyń aıtýynsha, ýran naryǵynyń óz erejeleri bar.

«Reaktordy ornatyp beretin tarap pen tehnologııany tutynýshy tarap kelissóz kezinde otyndy qaıdan alatynyn aldyn ala bekitip alady. Sondyqtan siz aıtyp otyrǵan Ózbekstanda AES salý kelissózi boıynsha otyn máselesi de shartqa enip qoıdy dep topshylaımyn. Tipti ýran berý arqyly ózge elden atom energııasyn paıdalandyq degen kúnniń ózinde qaýipsizdik máselesi bar. Iá, biz ýran jetkizip turýymyz múmkin. Biraq elektr qýaty boıynsha báribir táýeldi bolamyz. Ýran naryǵy Qazaqstanmen ǵana shektelmeıdi. Qazir ol bırja alańdary arqyly satylady», - dedi Aıdos Dáribaev.