Qazaqstanda AES qurylysyna 10 myńǵa deıin maman tartý josparlanyp jatyr

Salaǵa qajetti kadrlardyń basym bóligi tehnıkalyq baǵyttaǵy mamandar bolady. Qurylys barysynda 3 myńnan astam adam jumysshy mamandyqtar boıynsha qamtylmaq.

– AES qurylysy kezeńinde shamamen 10 myń adamdy tartý josparlanýda, onyń ishinde 3 myńnan astamy tehnıkalyq mamandyqtar boıynsha jumysshylar. Al paıdalaný kezeńinde bir atom elektr stantsııasy shamamen 2 myń adamdy turaqty jumyspen qamtıdy, – delingen málimette.

Paıdalaný kezeńinde kadrlyq qurylym naqty bóliniske ıe bolady: shamamen 600 joǵary bilimi bar maman, 550 orta býyn qyzmetker jáne 850 bilikti jumysshy qajet bolady.

Osyǵan baılanysty elimizde bilim berý baǵdarlamalaryn jańartý jumystary júrgizilýde. Ásirese tehnıkalyq jáne kásiptik bilim berý baǵytyna erekshe kóńil bólingen.

– Qazirgi tańda týrbınalyq jabdyq mashınısi-obhodshysy, elektrmonter, AES jabdyqtaryn montajdaýshy jáne stantsııanyń qaýipsiz ári úzdiksiz jumysyn qamtamasyz etetin tehnıkterdi daıarlaý baǵytynda bilim berý baǵdarlamalary jańartylyp jatyr. Sonymen qatar atom energetıkasy salasynda qoldanbaly bakalavrıat baǵdarlamalaryn engizý kózdelgen, – dep atap ótilgen.

Joǵary oqý oryndarynda da jańa mamandyqtar ashý josparlanýda. Atap aıtqanda, reaktorlyq jabdyq operatorlaryn daıarlaý máselesine basymdyq berilip otyr.

– ıAdrolyq qondyrǵylardy qaýipsiz paıdalanýǵa jaýap beretin reaktor operatorlaryn daıarlaý úshin jańa bilim berý baǵdarlamalaryn iske qosý qajet, – delingen aqparatta.

Sarapshylardyń pikirinshe, atom energetıkasy salasynyń damýy ekonomıkanyń ózge baǵyttaryna da oń áser etedi.

– Halyqaralyq zertteýlerge sáıkes, atom energetıkasyndaǵy bir jumys orny sabaqtas salalarda onǵa deıin qosymsha jumys ornyn qurýǵa múmkindik beredi. Bul salanyń mýltıplıkatıvtik áserin kórsetedi, – dep qorytyndylanǵan.

Aıta keteıik, Prezıdent atom salasyn damytýdyń 2050 jylǵa deıingi strategııasyn bekitti.