Qazaqstanda AES qurylysy boıynsha quzyretter ortalyǵy qurylady
ASTANA. KAZINFORM – Qazaqstanda atom energetıkasyn damytý aıasynda AES qurylysy boıynsha arnaıy quzyretter ortalyǵyn ashý josparlanyp otyr.
Atom energııasy agenttiginiń málimetinshe, bul ortalyq vedomstvolyq baǵynysty «Qazaqstandyq atom elektr stantsııalary» JShS bazasynda qurylmaq. Ol jobalyq keńse jáne bas tapsyrys berýshi fýnktsııalaryn atqaryp, bolashaq atom elektr stantsııalarynyń memlekettik aktsııalar paketterine ıelik etý quqyǵyna ıe bolady.
Sonymen qatar aldaǵy ýaqytta atom energetıkasyn júıeli damytý úshin jańa qurylym qalyptastyrý josparlanǵan.
– Perspektıvada atom energetıkasyn damytý boıynsha kúsh-jigerdi shoǵyrlandyrý maqsatynda «Qazaqstandyq atom elektr stantsııalary» JShS bazasynda mamandandyrylǵan atom-energetıkalyq holdıng qurý josparlanyp otyr. Onyń quramyna Qazaqstandaǵy atom elektr stantsııalaryn jobalaý jáne paıdalaný jónindegi uıymdar biriktiriledi, – dep atap ótilgen.
Mamandardyń aıtýynsha, mundaı qurylym salany ortalyqtandyrylǵan túrde basqarýǵa jáne iri jobalardy tıimdi iske asyrýǵa múmkindik beredi.
Aıta keteıik, Prezıdent atom salasyn damytýdyń 2050 jylǵa deıingi strategııasyn bekitti.
