Qazaqstanda AES ataýyn kommertsııalyq maqsatta qoldaný ıdeıasy usynyldy

ASTANA. KAZINFORM — Atom energııasy jónindegi agenttigi elimizde alǵash salynatyn atom elektr stansasy ataýyn satýǵa qatysty túsinik berdi. 

Agenttiktiń baspasóz qyzmeti taratqan aqparatqa súıensek, marketolog jelide AES ataýyn kommertsııalyq maqsatta qoldanyp, avtomobıl nómiri sekildi satý jóninde usynys jasaǵan. 

— Sizdiń usynysyńyz marketıng turǵysynan shynynda da kreatıvti. Alaıda, atom elektr stantsııasy — Qazaqstan Respýblıkasy úshin strategııalyq mańyzy bar nysan. Onyń ataýy tarıhı, mádenı jáne ulttyq qundylyqty beınelep qana qoımaı, el azamattary úshin senim men birlikti bildiretin sımvolǵa aınalýy tıis. Kommertsııalyq jobalardan aıyrmashylyǵy, atom energetıkasyn satý nemese ýaqytsha aınalymǵa túsetin brend retinde qarastyrýǵa bolmaıdy, — degen túsinik berdi agenttik.

Resmı aqparatta aıtylǵandaı, AES ataýyn tańdaý konkýrsy halyqtyń qatysýmen ótedi. Ol búkil qazaqstandyq úshin ortaq sımvolǵa aınalýy tıis.

— Qazir Atom energetıkasy agenttigi múddeli memlekettik organdarmen birlesip, atalǵan konkýrsty ótkizý tetigin ázirleý máselesin pysyqtap jatyr, — delingen habarlamada.

Aıta ketsek, birneshe kún buryn Atom energııasy jónindegi agenttik Almaty oblysynyń Jambyl aýdanynda salynýy josparlanǵan atom elektr stansasyna ataý berý boıynsha jalpyhalyqtyq konkýrsty uıymdastyrý jumysyna kirisken edi.