Qazaqstanda advokatýra ınstıtýty qalyptasty, biraq olardyń sany jetkiliksiz

Bul pikirdi búgin elordada ótken QR Prezıdenti janyndaǵy Adam quqyqtary jónindegi komıssııa Saraptamalyq keńesiniń keńeıtilgen otyrysynda atalǵan komıssııa hatshysy Tastemir Ábishev bildirdi.

«Jalpy Qazaqstanda advokatýra ınstıtýty qalyptasty, biraq olardyń sany jetkiliksiz. Sondyqtan olardyń sapasyn arttyryp, sanyn kóbeıtý qajet», dep atap ótken ol advokattardyń táýelsizdigin qamtamasyz etý kerektigin de basa aıtty.

Onyń pikirinshe, advokattardan biliktilik emtıhanyn alý úrdisin oblystarda, sondaı-aq qalalarda ornalasqan respýblıkalyq deńgeıdegi advokattar alqasyna bergen jón. Sonymen qatar elimizdiń Konstıtýtsııasyna sáıkes kez kelgen azamat zań kómegine júginýge quqyly ekendigin aıtqan T.Ábishev, «bizdiń eldiń azamaty, elimizde turaqty jáne ýaqytsha turatyn sheteldiń azamattary bilikti zańgerlik kómek alýǵa quqy bar. Zańmen kózdelgen retterde azamattar quqyqtyq kómekti aqysyz, tegin ala alady delingen. Degemen osy tetik bizde álsizdeý. Biz osy máselege kóberik kóńil bóletin bolamyz», dedi.

«Qazaqstan Respýblıkasynyń keıbir zańnamalyq aktilerine advokatýra jónindegi ózgerister men tolyqtyrýlar engizý týraly» QR Zań jobasyn talqylaýǵa arnalǵan otyrys barysynda elimizdegi advokatýra ınstıtýtynyń jaı-kúıi, halyqqa zańgerlik qyzmet kórsetýdiń deńgeıi, qarapaıym halyq, sonyń ishinde halyqtyń áleýmettik jaǵynan az qorǵalatyn toptarynyń bilikti zańgerlik kómek alý deńgeıi qandaı degen máseleler jan-jaqty talqyǵa salyndy.

Alqaly jıyn barysynda qabyldanǵan sheshimder QR Prezıdenti janyndaǵy Adam quqyqtary jónindegi komıssııa músheleriniń nazaryna usynylyp, el Úkimeti men Parlamentine joldanatyn bolady.