Qazaqstanda advokattardyń qyzmeti qansha turady
ASTANA. KAZINFORM - Advokattar qyzmetiniń qunyna birneshe faktor áser etedi. Іstiń kúrdeliligi, jumystyń aýqymy men qorǵaýshylardyń tájirıbesi jáne aımaqqa baılanysty ártúrli bolyp keledi. Bul týraly Kazinform agenttiginiń tilshisi anyqtap bildi.

Qorǵaýshylar ár iske ártúrli baǵa qoıady. Іspen qatar óndirip alatyn ótemaqynyń paıyzyna, saǵatyna jáne ózge de syıaqyǵa kelisim qatar júredi.
Maqala jazý kezinde barlyǵyna ortaq talap tańdaldy. Aldymen qońyraý shalyp, zańgerden aýyzsha keńes alý, keıin onyń kómegimen shaǵym nemese talap aryz jazý, sodan soń sotta qorǵaý usynysy qaraldy. Internet arqyly arzan baǵa usynǵandarǵa habarlasyp, Qazaqstan qalalarynda qorǵaýshy qyzmeti qansha turatynyn anyqtap bildik.
Megapolısterde baǵa joǵary. Astanada - 43 000 teńge, Almatyda - 37 000 teńge. Sonymen birge Qonaev qalasynda da qyzmet quny ózgelerge qarǵanda joǵary bolyp tur. Munda qorǵaýshylar 32 000 teńge suraıdy.
Odan ári Jezqazǵan men Pavlodar qalalary tur. Eki qalada da keńes alý quny 5 000 teńgeden bastalady. Al talap aryz jazý quny 10 000, sotta qorǵaý qyzmetiniń baǵasy 13 000 teńge. Sóıtip 28 myń teńge tóleýge týra keledi.
Qostanaı, Oral, Aqtóbede advokat qyzmetiniń quny – 22 000 teńge. Qaraǵandyda 21 000, Semeı men Kókshetaýda 20 000 teńge turady.
Ózge megapolısterge qaraǵanda Shymkentte bul qyzmettiń quny áldeqaıda qoljetimdi. Keńes alý, talap aryz jazý jáne sotta qorǵaý quny 18 000 teńge. Al Tarazda 16 000 teńge turady.
Túrkistan, Aqtaý, Taldyqorǵan jáne Qyzylordada sot isterin júrgizý quny shamalas. Bul qalalarda 15 000 teńge suraıdy. Túrkistan men Aqtaýda keńes alý qymbat, al sotqa qatysyp, qorǵaý arzanǵa túsedi. Al Taldyqorǵan, Qyzylordada aqshanyń kóp bóligi sotqa qatysyp, qorǵaýǵa tólenedi.
Óskemen men Pavlodar eń arzan óńirler arasynda ekinshi orynda tur. Munda úsh qyzmet úshin qorǵaýshylar 13 000 teńge suraıdy. Al Qazaqstan boıynsha eń arzany Atyraý qalasynda bolyp shyqty. Munda qyzmet quny – 12 000 teńge.
Buǵan deıin Qazaqstanda býhgalterlik qyzmet quny qansha turatynyn bildik.
