Qazaqstanda advokattar jetispeıdi - mınıstr
Qazaqstan advokatýrasyndaǵy negizgi máselelerdiń biri, mınıstrdiń aıtýynsha, advokattardyń jetispeýshiligi.
«Qazaqstandaǵy advokattardyń qazirgi sany azamattardyń tolyqqandy zańgerlik kómekke júginýi úshin jetkiliksiz. Bálkim, bul sózimmen kelispeıtinder tabylar, biraq Ádilet mınıstrliginde ózekti problemalardy anyqtaıtyn arnaıy ýákiletti organ bar jáne biz ol máselelerdi ashyq talqylaýymyz kerek. Qazirgi ýaqytta Qazaqstanda shamamen bir advokatqa 3 900 azamattan keledi. Salystyryp qarar bolsaq, Germanııada 500, Anglııada bir advokatqa 890 azamat», - deıdi mınıstr.
Beketaevtyń aıtýynsha, advokattardyń jetispeýshiliginiń basty sebebi qarjylyq kedergi bolyp otyr.
«Lıtsenzııa alý úshin mindetti taǵylymdama quny men aýmaqtyq advokattar alqasyna jarnany tóleý kerek. Shyǵyndar ár óńirde ár túrli, ortasha alǵanda 800 myń teńgeden 1 mıllıon teńgege deıin jetedi», - dedi ol.
Atalǵan máseleni sheshý maqsatynda, respýblıkalyq advokattar alqasy men mınıstrlik birlesip, jarna men taǵylymdama tóleminiń qunyn tómendetý máselesin qarastyryp jatyr.
«Bul sharalar advokattar sanyn ósiredi degen senimdemiz», - dep óz sózin jalǵastyrdy Beketaev. «Advokattyq korpýs sanynyń ósýi básekelestikti kúsheıtedi jáne kórsetilgen qyzmet úshin beriletin gonorar somasyn arzandatady. Oǵan qosa, bul básekelestik advokattardyń kásibı biliktilikterin udaıy jetildirýge yntalandyrady, sáıkesinshe zańgerlik kómek pen halyqqa qoljetimdilik sapasy jaqsara túsedi», - dedi ol
Advokatýradaǵy taǵy bir ózekti másele advokattar jumysyna halyqtyń kóńiliniń tolmaýy jáne shaǵymdardyń artýy.
«Jyl saıyn advokattar jumysyna túsken shaǵymdarynyń kólemi artyp keledi, bul shaǵymdardy tekserý ýákilettiligi oblystyq alqalardyń quzyryna berilgen. Alaıda, is júzinde keı oblystyq alqalar advokattardy tártiptik jaýapkershilikke tartpaıdy. Advokattardyń jaýapkershilikten sytylyp ketý máselesin sheshý úshin mınıstrlik respýblıkalyq advokattar alqasynyń ókilettiligin arttyrýdy josparlaýda», - dedi ol.
Atap aıtqanda, mınıstrlik respýblıkalyq advokattar alqasyna shaǵymdardy tekserý, tártiptik jaýapkershilikter týraly materıaldary qaraý jáne tártiptik jaza taǵaıyndaý ókilettigin berýdi usynady. Sondaı-aq azamattardy aqparattandyrý maqsatynda jaýapkershilikke tartylǵan advokattar týraly málimetterdi respýblıkalyq alqanyń resmı saıtyna jarııalaý mehanızmin usyndy.
Eske sala ketsek, búgin QR Ádilet mınıstri Marat Beketaev halyq aldynda esep berý kezdesýin ótkizdi jáne onlaın júıede QR turǵyndarynyń saýaldaryna jaýap berdi.
