Qazaqstanda «Ádilet» partııasyn qurý bastamasyn 947 azamat qoldady
ASTANA. KAZINFORM — Qazaqstanda memlekettik tirkeýden ótý kezeńindegi «Ádilet» saıası partııasyn qoldaý maqsatynda 947 azamat ótinish bergen. Bul týraly partııanyń uıymdastyrý komıteti habarlady.
Astanada ótken brıfıngide uıymdastyrý komıtetiniń múshesi Raýan Kenjehanuly tsıfrlyq platforma iske qosylǵaly beri Ádilet mınıstrligine tirkelý úshin qajetti 5 000 ótinishtiń 947-si jınalǵanyn málimdedi.
Ótinishterdiń basym bóligi Qaraǵandy oblysynan túsken — 196. Odan keıin Jetisý oblysy — 188, Qostanaı oblysy — 130. Astanadan — 118 adam, Almaty qalasynan — 90 adam, Almaty oblysynan 55 adam qoldaý bildirgen.
Basqa óńirlerdegi kórsetkishter tómenirek: Qyzylorda oblysy — 27, Aqtóbe oblysy — 20, Aqmola oblysy — 18, Jambyl jáne Mańǵystaý oblystary — 15-ten, Túrkistan oblysy — 13, Abaı oblysy — 11, Batys Qazaqstan oblysy — 10, Pavlodar oblysy — 7, Soltústik Qazaqstan jáne Atyraý oblystary — 5-ten, Shyǵys Qazaqstan oblysy — 4, Ulytaý oblysy — 3.
Aıta keteıik, partııany tirkeý úshin ár óńirden keminde 200 qol jınaý qajet.
Uıymdastyrý komıtetiniń taǵy bir múshesi Qarlyǵash Jamanqulovanyń aıtýynsha, partııa qataryna qosylǵysy keletin Qazaqstan azamattary www.adilet-partiyasy.kz saıtynda elektrondy ótinish toltyra alady.
— Partııaǵa eń aldymen 18 jasqa tolǵan Qazaqstan azamattary múshe bola alady. «Saıası partııalar týraly» zańǵa sáıkes belgili bir shekteýler bar. Mysaly, sýdıalar men áskerı qyzmetshiler partııaǵa múshe bola almaıdy. Al qalǵan kámeletke tolǵan azamattar óz qalaýymen saıası partııalarǵa qosylyp, olardy qoldaı alady, — dedi ol.
Partııa Ádilet mınıstrliginde tirkelgenge deıin atalǵan platforma pılottyq rejımde jumys isteıdi.
— Bolashaqta bul platforma partııa múshelerine arnalǵan tsıfrlyq ınfraqurylymǵa aınalady. Onda biz naqty ýaqyt rejıminde aqparat almasyp, pikirtalastar ótkizip, chattar men áleýmettik jeliler qura alamyz, — dep túsindirdi Qarlyǵash Jamanqulova.
Onyń aıtýynsha, Qazaqstanda saıası partııalardyń múshesi sanalatyn azamattar sany 3 mıllıonǵa jetpeıdi. Sonyń saldarynan halyqtyń edáýir bóligi saıası úderisterden tys qalyp otyr.
Buǵan deıin bastamashyl top «Ádilet» atty jańa saıası partııanyń qurylatynyn málimdegen edi.
Sonymen qatar Senat tóraǵasy elde jańa partııalardyń qurylýyna qatysty pikir bildirdi.
