Qazaqstanda Ádebıet jáne óner jónindegi keńes qurylady

ASTANA. QazAqparat - Qazaqstanda Ádebıet jáne óner jónindegi keńes qurylady. Bul týraly Ortalyq kommýnıkatsııalar qyzmetindegi brıfıngte Mádenıet jáne sport vıtse-mınıstri Asqar Bóribaev málim etti.

«Salany jáne basqarý máselelerin budan ary qaraı qaıta qurý maqsatynda Ádebıet jáne óner jónindegi ulttyq keńesti, sondaı-aq salalar boıynsha kórkemdik keńesterdi qurý josparlanyp otyr. Olar úılestirý sharalaryn qamtamasyz etedi. Meniń oıymsha, barsha elimizdiń aýqymynda bundaı qadamdar óte mańyzdy», - dedi A. Bóribaev.

Atalǵan keńes Qazaqstannyń mádenı saıasatynyń tujyrymdamasy aıasynda qurylmaq.

«Tujyrymdamada birqatar is-sharalar qarastyrylǵan. Olar shyǵarmashylyq odaqtar men ekonomıkanyń shyǵarmashylyq sektoryn qamtı otyryp, ıaǵnı kınematografııa, teatr, tsırk, mýzyka óneri, mýzeı isi sekildi ónerdiń bólek salalaryn damytýǵa baǵyttalǵan. Tujyrymdama otandyq mádenıetti damytýǵa jańa serpin berýge múmkindik jasaıdy», - dedi ol.

Vıtse-mınıstr atalǵan tujyrymdama Qazaqstanda alǵash ázirlenip otyrǵandyǵyn atap ótti. «Biz ǵalymdardy, shyǵarmashylyq odaqtardy, azamattyq qoǵamdy jumyldyrdyq», - dedi ol.