Qazaqstanda adamnyń kelbetin tanıtyn tehnologııany engizý qaralyp jatyr

NUR-SULTAN. QazAqparat – Elimizdiń ishki ister organdary qyzmetinde adamnyń kelbetin tanıtyn tehnologııany engizý máselesi qaralyp jatyr. Bul týraly QR Іshki ister mınıstriniń orynbasary Sáken Sársenov málim etti, dep habarlaıdy QazAqparat tilshisi.

Búgin Ortalyq kommýnıkatsııalar qyzmetinde elimizdiń ishki ister organdary qyzmetin tsıfrlandyrý taqyrybyna arnalǵan baspasóz máslıhaty ótti.

Brıfıng barysynda «Almaty - 2025» jobasynda adamnyń kelbetin tanıtyn jáne bıometrııalyq derekterdi anyqtaıtyn qurylǵyny engizý qarastyrylǵan. Osy oraıda jańa tehnologııany qashan engizý josparlanyp otyr? degen saýal qoıyldy.

Óz kezeginde QR Іshki ister mınıstriniń orynbasary Sáken Sársenov elimizde atalǵan jańashyldyqty engizý máselesi talqylanyp jatqanyn aıta kele, biraq naqty sheshimniń qabyldanbaǵanyn jetkizdi.

«Qazirgi tańda beınebaqylaý kamerasynyń túrli múmkindikteri álem elderinde keńinen qoldanylyp jatyr. Onyń qatarynda adamnyń túr álpetin taný fýnktsııasy men bıometrııalyq málimetterdi anyqtaý da bar. Odan bólek, túrli formattaǵy shýǵa áser etip, anyqtaıtyn qurylǵy da bar. Mysaly, aıtalyq qyzyl tústi Toyota Camry markaly avtokólikke izdeý salyndy, atalǵan qurylǵy soǵan uqsas jeńil kólik dybysyn estigende dabyl qaǵady. Sol sekildi búginde bıometrııalyq derekterdi anyqtaý tehnologııasyn engizý de talqylaný ústinde», - dep jaýap berdi S. Sársenov.

Sondaı-aq, mınıstr orynbasary AQSh, Ulybrıtanııa jáne Ońtústik Koreıa sekildi elderdiń quqyq qorǵaý organdarynda zamanaýı tehnologııany engizý edáýir alǵa jyljyp ketkenin aıtyp ótti.

Onyń aıtýynsha, jańa tehnologııalar qylmysty izin sýytpaı ashýmen qatar onyń aldyn alýǵa múmkindik beredi.

Buǵan deıin S. Sársenov bıyl 9 aıdyń ishinde el kóleminde beınebaqylaý kameralarynyń kómegimen 10 myńǵa jýyq qylmystyń beti ashylǵanyn málim etti.

Odan bólek, elimizde jol erejesin buzý faktileriniń 44 paıyzyn beınebaqylaý kamerasy anyqtaǵany belgili boldy.