Qazaqstanda adamnyń qaıtys bolǵany týraly kýálikti alý protsesteri jeńildedi

NUR-SULTAN. QazAqparat – Qazaqstanda adamnyń qaıtys bolǵany týraly kýálikti alý protsesteri jeńildedi. Bul týraly Tsıfrlyq damý ınnovatsııalar jáne aeroǵarysh ónerkásibi mınıstri Baǵdat Mýsın jelidegi paraqshasynda jazdy, dep habarlaıdy QazAqparat.

«Prezıdent Ákimshiliginde qyzmet etken kezde - pandemııa ýaqytynda Prezıdent máıithanalardyń janynda kóptegen adamdar jınalǵanyna nazar aýdardy. Biz onyń tapsyrmasy boıynsha talqylap, istiń mán-jaıyn anyqtadyq. Mekemeler arasyndaǵy bıýrokratııaǵa baılanysty qaıtys bolǵany týraly kýálik alýdyń kúrdeli protsesteri bar. Osy protsesti ózgertý úshin men ony elektrondyq júıege aýystyrý bastamasyn kóterdim», - dedi mınıstr.

Onyń habarlaýynsha, barlyq memlekettik organdar (QR DSM, QR ÁM jáne QR BP QSjAEK) tolyq ıntegratsııalaýdy jedel túrde pysyqtaǵan. Endi qaıtys bolǵany týraly kýálikti alý boıynsha kúrdeli protsestiń ornyna eGov.kz portaldan bir anyqtamany alýǵa bolady. Bul servıs birden birneshe anyqtamany joıady.

«Ókinishke qaraı, pandemııa kezinde kópshiligimiz osy jaǵdaıǵa tap boldyq. Bizdiń mindetimiz osyndaı qıyn kezeńde qajeti joq júrýdi jeńildetý boldy. Mundaı protsesterdi avtomattandyrý mańyzdy. Sondyqtan biz qaǵazbastylyqty barynsha azaıtyp, barlyǵyn onlaın rejımge kóshirýdi jalǵastyramyz», - dep jazdy Baǵdat Mýsın.