Qazaqstanda adamnyń bet-álpetin búrkemeleıtin kıimge tyıym salynbaq

ASTANA. QazAqparat - Jeltoqsanda Qazaqstanda qoǵamdyq oryndarda adamnyń bet ajaryn búrkemeleıtin kıimmen júrýge taıymsalatyn zań jobasyn qabyldaý josparlanyp otyr. Bul týraly búgin Úkimette ótken baspasóz máslıhatynda QR Din isteri jáne azamattyq qoǵam mınıstri Nurlan Ermekbaev málim etti, dep habarlaıdy QazAqparat.

«Bıyl qarashada Parlamet qaraýyna zań jobasyn engizip, ony depýtattardyń qoldaýymen jeltoqsanda qabyldaý josparlap otyr. Qujat jobasynda qoǵamdyq oryndarda adamnyń bet ajaryn búrkemeleıtin nemese adamnyń túrin anyqtaýǵa kedergi keltiretin kıimmen júrýge tyıym salatyn norma eskerilgen»,-dedi mınıstr suraqtarǵa jaýap berý barysynda.

Onyń sózine qaraǵanda, zańnamaǵa tolyqtyrýlar men ózgerteýlerdiń ıdeologııalyq negizin 2017-2020 jyldarǵa arnalǵan din salasyndaǵy memlekettik saıasattyń tujyrymdamasy qurady. Bul baǵytta sarapshylar men ǵalymdardyń úlken toby birneshe aı boıy jumys istedi.

Budan buryn habarlanǵandaı, baspasóz máslıhatynda mınıstr 2018 jyly mektep baǵdarlamasyna din taqyrybyndaǵy jańa oqýlyq engiziletinin málim etti.