Qazaqstanda adamdarǵa nesıelerin jaýyp berýdi ýáde etken qarjy pıramıdasy anyqtaldy
ASTANA. QazAqparat - Qazaqstanda adamdarǵa nesıelerin jaýyp berýdi ýáde etken qarjy pıramıdasy anyqtaldy. Bul týraly QR Qarjy mınıstrligi memlekettik kirister komıtetiniń baspasóz qyzmeti «QazAqparat» tilshisiniń resmı saýalyna bergen jaýabynda jarııa etti.
2016 jyly 14 qyrkúıek kúni memlekettik kirister komıtetiniń Almaty qalasy boıynsha ekonomıkalyq tergeý qyzmeti R. A. Zıatdınovqa, I. A. Zıatdınovqa, R.F. Ahmadýlınge, D.S. Ksenofontovqa, A. Chernenkoǵa jáne I.O.Tursynbaevǵa qatysty qozǵalǵan qylmystyq isti sotqa joldaǵan. Tergeý barysynda anyqtalǵanyndaı, 2014 jyly tamyz aıynda R.A. Zıatdınov qarjy pıramıdasyn quryp, azamattardan qarajat jymqyrý maqsatynda Reseı azamattary I.A. Zıatdınovpen , R.F, Ahmadýllınmen jáne D.S. Ksenofontovpen birge kelisim jasaıdy.
Aram oılaryn júzege asyrý úshin «FınStatýs» JShS atty kompanııa qurady. Sonan soń, klıentterdi jınaý maqsatynda buqaralyq aqparat quraldarynda jarnama jiberedi.
«Óz klıentteriniń sanyn arttyrý úshin olar ózge de tulǵalardy tartqan. Onyń ishinde franshızalardy usyný arqyly meılinshe belsendi deldaldar da bolǵan. Olarǵa «FınStatýs» JShS atynan sóıleýge, klıentterdi tartýǵa, kelisim jasasýǵa múmkindik berilgen, olar bul qyzmetteri úshin árbir klıentten «FınStatýs» kompanııasynyń esepshotyna aýdarylǵan qarajattardyń 5-15 paıyzyn alyp otyrǵan. Osylaısha, «FınStatýs» JShS fılıaldary Qazaqstannyń Almaty, Astana, Qaraǵandy, Shymkent, Aqtóbe, Qyzylorda, Ekibastuz, Aqtaý, Jańaózen, Pavlodar, Óskemen, Semeı, Taraz syndy negizgi qalalarynda ashylǵan», - delingen vedomstvonyń resmı habarlamasynda.
«FınStatýs» kompanııasy ekinshi deńgeıli bankterde nesıeleri bar azamattardan atalmysh qaryzdy tolyq jaýyp berýge ýáde berip, nesıeniń 40 paıyzyna teń keletin somany alyp otyrǵan. Degenmen ol bul mindettemeni oryndaýǵa múmkindik beretin eshqandaı kommertsııalyq qyzmetpen aınalyspaǵan. Úzdiksiz túsip otyrǵan qarajattyń jartysyn qylmystyq top músheleri kompanııa esepshotynan sheship, ózderiniń jeke muqtajdyqtaryna paıdalanyp kelgen. Jartysyn klıentterdiń aı saıynǵy nesıelerin jaýyp otyrypty. Osylaısha, olar óz mindettemelerin oryndaǵan syńaı tanytyp kelgen.
Sot-ekonomıkalyq saraptamasy boıynsha, 2014 jyldyń jeltoqsan aıynan 2016 jyldyń 10 aqpany aralyǵynda «FınStatýs» kompanııasy 1824 kelisimshart jasasqan. Onyń 1720 kelisimsharty boıynsha, 638 039 409 teńge somasynda qarajat alynǵan.
