Qazaqstanda adam saýdasyna baılanysty qylmys azaıyp keledi – Tastemir Ábishev

NUR-SULTAN. QazAqparat – Qazaqstanda 2018-2020 jyldary aralyǵynda adam saýdasyna qatysty 1 100-ge jýyq qylmys tirkeldi. Bul týraly QR Prezıdenti janyndaǵy Adam quqyqtary jónindegi komıssııa hatshysy Tastemir Ábishev aıtty.

«Adam quqyqtaryn buzýdyń eń jaman túriniń biri – adam saýdasy. Ózderińiz biletindeı, tabys tabý jaǵynan adam saýdasy zańsyz bıznestiń ishinde úshinshi orynda tur. Birinshisi - zańsyz qarý-jaraq satý, ekinshisi - zańsyz esirtki saýdasy. BUU Kóshi-qon komıtetiniń esebine sáıkes, adam saýdasymen aınalysatyndar jyl saıyn 150 mlrd dollardan astam tabys tabady eken. Qazaqstanda da adam saýdasynyń aldyn alý jáne olarmen kúres joldaryn jetildirý úshin, sonymen qatar adam saýdasy qurbandaryna ataýly áleýmettik kómek kórsetýdi jaqsartý úshin QR Prezıdenti janyndaǵy Adam quqyqtary jónindegi komıssııa memlekettik organdarmen, daǵdarys ortalyqtarymen, memlekettik emes uıymdarmen birlesip, arnaýly baıandama daıyndady. Bul baıandama negizinen Prezıdent Qasym-Jomart Toqaevtyń 2020 jylǵy 1 qyrkúıektegi Joldaýynda jáne 2020 jylǵy 22 qazandaǵy Ulttyq qoǵamdyq senim keńesiniń otyrysynda bergen tapsyrmalaryn oryndaý úshin ázirlendi», - dedi ol atalǵan komıssııa otyrysy aldynda BAQ ókilderine bergen suhbatynda.

Onyń aıtýynsha, elimizde adam saýdasy qurbandaryna 2016 jyldan bastap ataýly áleýmettik kómek kórsetiledi. Biraq, ol kómek tek Qazaqstan azamattaryna, elimizdi turǵylyqty turyp jatqan sheteldik azamattarǵa, qandastarǵa jáne azamattyǵy joq adamdarǵa ǵana beriledi. Al elimizge birneshe aıǵa ýaqytsha kelgen eńbekshi mıgranttar adam saýdasynyń qurbany bolǵan jaǵdaıda eshqandaı ataýly kómek ala almaıdy.

«Bul, árıne, halyqaralyq standarttarǵa saı kelmeıdi. Qazaqstan 2008 jyly Polermo hattamasyn ratıfıkatsııalaǵan. Sol Polermo hattamasyna sáıkes, oǵan qatysýshy árbir memleket elinde turyp jatqan óziniń azamattaryna, ýaqytsha nemese turǵylyqty turyp jatqan sheteldik azamattarǵa múmkindiginshe arnaýly áleýmettik kómek kórsetýi qajet. Statıstıka boıynsha 2018, 2019 jáne 2020 jyldary adam saýdasyna baılanysty 1 100-ge qylmys tirkelgen. Degenmen, mundaı qylmys jyldan jylǵa az tirkele bastady. Atalǵan qylmystarǵa baılanysty 242 adam sottaldy. Bul da tómendep keledi», - dedi Tastemir Ábishev.