Qazaqstanda adam saýdasy jappaı sıpatqa ıe emes - QR Prezıdenti janyndaǵy Adam quqyqtary jónindegi komıssııa

ASTANA. QazAqparat - Búgin QR Prezıdenti janyndaǵy Adam quqyqtary jónindegi komıssııasy sarapshylyq keńestiń keńeıtilgen otyrysyn ótkizip, onda «Adam saýdasyna tosqaýyl qoıý salasynda adam quqyqtaryn qorǵaýdyń ózekti problemalary» baıandamasynyń arnaıy jobasy talqylandy.

«Qazaqstanda adam saýdasy jappaı sıpatta emes, alaıda, jyl saıyn bul baǵytta qylmystar sany artýda. QR Bas prokýratýrasynyń málimetinshe, 2012 jyly - 267 qylmys, 2013 jyly - 350, al 2014 jyldyń 9 aıynda 262 qylmys tirkeldi»,- dedi komıssııa hatshysy Tastemir Ábishev.

Onyń aıtýynsha, adam saýdasyna qatysty qylmystardy jasaǵany úshin sottalǵan azamattar sany da artty. 2012 jyly 116 adam, 2013 jyly - 166, bıylǵy 9 aıda 134 adam sottaldy.

Komıssııa baıandamasynda adam saýdasyna baılanysty qylmystardy eskertý men aldyn alýǵa negizgi ekpin qoıylǵan, onyń ishinde atalǵan qylmys qurbandarynyń arnaıy áleýmettik qyzmetter keshenin alý quqyǵyn qamtamasyz etýge baǵyttalǵan.

Talqylaýlar qorytyndysy boıynsha komıssııa baıandamany qaraý úshin jáne bekitýge Memleket basshysyna usyný sheshimi qabyldady.

Halyqaralyq uıymdardyń málimetinshe, tabystylyq jaǵynan alyp qaraǵanda adam saýdasy álemde qarý saýdasynan keıin úshinshi orynda tur. Halyqaralyq eńbek uıymynyń statıstıkasy boıynsha álemde 21 mln. adam quldyqta júr. Al 2014 jyly adam saýdasynan túsken tabys 150 mln. AQSh dollarynan astam qarjyny quraǵan.