Qazaqstanda adam ómirine qaýip tóndiretin 9 sý qoımasy bar
«Qazaqstanda 312 sý qoımasy bar. Onyń 84-i respýblıkalyq, 168-i kommýnaldyq menshikte bolsa, 4 shaǵyn sý qoımasynyń ıesi joq. Al qalǵan 39-y - jekemenshiktiń qolynda. Bul sý qoımalarynyń 27-siniń tehnıkalyq jaǵdaıy qaýipti dep baǵalanady. Sonyń 16-sy adam ómirine qaýip tóndirmeıdi, biraq apatty jaǵdaıda deýge bolady. Qaýip tóndirmeıtin sebebi - olarda sý jınalmaıdy. 9 sý qoımasy adam ómirine qaýip tóndiredi. Sondyqtan olardy qazirgi ýaqytta menshik ıeleri qalpyna keltirý jumystaryn júrgizýde», - dedi ol.
Komıtet basshysynyń aıtýynsha, elimizde sý qoımalary apaty saldarynan eki qaıǵyly oqıǵa tirkelgen. Onyń biri Almaty oblysyndaǵy Qyzylaǵashta, ekinshisi Qaraǵandy oblysyndaǵy Kókpektide oryn alǵan.
«Elimizdegi adam ómirine, tirshiligine qaýip tóndiretin sý qoımalarynyń barlyǵy da tolyqtaı zerttelgen. Olardy táýekelderine qaraı úsh sanatqa bólip qarastyrý kerek. Birinshi sanatqa eń qaýipti sý nysandary jatady. Biz dál osy sanatqa jatatyn nysandardyń barlyǵyn zerdelep, ne isteý qajettigin aıqyndadyq jáne jóndeý jumystary qolǵa alyndy. Bul sanattaǵy barlyq sý qoımalaryn 2020 jyldyń sońyna deıin tolyqtaı jóndeýden ótkizemiz. Ol memlekettik bıýdjet qarajaty esebinen júrgiziledi. Al ekinshi sanattaǵy qaýipti nysandardy 2025 jylǵa deıin, úshinshi sanattaǵy nysandardy 2030 jylǵa deıin jóndeımiz», - dedi Islam Ábish.