Qazaqstanda adam óltirý faktisi boıynsha qylmys sany azaıdy - Bas prokýratýra

ASTANA. 18 qarasha. QazAqparat - Búgin Ashat Daýylbaevtyń tóraǵalyq etýimen Bas prokýratýra alqasynyń keńeıtilgen otyrysy bolyp ótti, onda qasaqana adam óltirý qylmystaryn ashý, osy sanattaǵy ister boıynsha sot-tergeý praktıkasy men prokýrorlyq qadaǵalaý boıynsha zańdylyqtyń jáne ishki ister organdary jedel-izdestirý qyzmeti tıimdiliginiń jaı-kúıi týraly máseleler qaraldy. Bul týraly Bas prokýratýranyń baspasóz qyzmetinen habarlady.

Bas prokýror otyrysty asha otyryp, talqylanatyn taqyryptyń asa ózektiligin atap ótti, adamnyń densaýlyǵy men ómirin qorǵaýdyń quqyq qorǵaý organdarynyń birinshi kezektegi mindetteri bolyp tabylatynyna toqtalyp ótti.

"Bul baǵytta Іshki ister organdary aıtarlyqtaı jumys atqardy. Qoǵamda quqyq buzýshylyqtarǵa múldem tózbeýshilikti qalyptastyrý boıynsha Memleket basshysynyń tapsyrmasyn oryndaý úshin asa aýyr qylmystardyń sanyn azaıtýdyń eleýli úrdisine qol jetkizildi. Máselen, aǵymdaǵy jylǵy 10 aıda ótken jylǵy deńgeımen salystyrǵanda tirkelgen adam óltirý qylmystarynyń sany 13,5 % azaıdy. Qylmystardyń ashylýy 80%-ǵa jýyqtady, qoǵamdyq pikirge arqaý bolǵan birqatar adam óltirý qylmystarynyń beti ashyldy, - dep málimdedi A. Daýylbaev. - Olar eń aldymen, qylmysty ashý kórsetkishterin jasandy túrde asyra kórsetýdiń eskirgen praktıkasy týraly bolyp otyr, sonyń saldarynan túrli qıturqy amal-sharttarǵa jol berilýde - qylmystyq ister zańsyz toqtatylýda, qylmystar bolsa, zańsyz qaıta saralanýda jáne esepke alýdan jasyrylýda. Ótken jyly jasalǵan 5311 qylmystyń ishinde, bıylǵy jyly olardyń 49 ǵana ashyldy".

Qalyptasqan jaǵdaı jedel-tergeý toptary jumystarynyń tıisinshe uıymdastyrylmaýy, jer-jerlerdegi profılaktıkalyq jumystardyń tómen bolýy saldarynan oryn alyp otyr.

Osyǵan baılanysty, Bas prokýror adam ólimine qatysy bar qylmystardy ashýdyń qoldanystaǵy formýlasyn qaıta qaraýdy usyndy, ol tergeý organdary jumysynyń tıimdiliginiń obektıvti kórinisin anyqtaýǵa yqpal etetin bolady. Prokýrorlarǵa aqtalatyn negizder boıynsha qysqartylǵan qylmystyq ister týraly jedel-tergeý organdary sheshimderiniń negizdiligine udaıy monıtorıng júrgizip otyrýdy tapsyrdy.

Sondaı-aq krımınalıstıka salasyn odan ári damytý, saraptamalyq mekeme qyzmetin jetildirý, sot-medıtsınalyq sarapshylary shtatyn keńeıtý qajettigi atap ótildi.

Prokýrorlarǵa jer-jerlerde qylmysqa qarsy kúres boıynsha quqyq qorǵaý organdarynyń qyzmetin tıisinshe qamtamasyz etý, qasaqana adam óltirý qylmystarynyń aldyn alý, olardy ashý jáne tergeý boıynsha jedel jumystardyń jaı-kúıin qadaǵalaýdy kúsheıtý tapsyryldy.