Qazaqstanda adam múshelerin tasymaldaǵan uıymnyń joly kesildi
NUR-SULTAN. QazAqparat – QR ІІM Krımınaldyq polıtsııa departamentiniń basshysy Dýman Taev Qazaqstandaǵy adam saýdasy qylmysynyń tergelý barysyn baıandady, dep habarlaıdy QazAqparat tilshisi.
«Qazaqstanda jyl saıyn 80-ge jýyq turǵyn adam saýdasynyń qurbany bolady. Jyl saıyn adam saýdasyna qatysty 180-ge jýyq is qozǵalady. Mundaı qylmys karantın kezinde de tirkelip jatty jáne odan qazaqstandyqtar da, shetel azamattary da zardap shegedi. Zardap shekken sheteldikter arasynda Ortalyq Azııa elderiniń azamattary kóp», - dedi departament basshysy mınıstrlik uıymdastyrǵan aptalyq brıfıngte.
Sonymen birge, ótken jyly eki uıymdasqan qylmystyq toptyń zańǵa qaıshy áreketi áshkerelengen.
«Sońǵy jyldary shetelge seksýaldyq quldyqqa 15 adamnyń shyǵarylǵany anyqtaldy. Ótken jyly eki uıymdasqan qylmystyq toptyń zańǵa qaıshy áreketi kesildi. Onyń biri adam múshelerin tasymaldaýdy uıymdastyrǵan, al ekinshisi – jezókshelikti uıymdastyryp, jeńgeıtaılyqpen aınalysqan. Sońǵy jyldary bizdiń azamattardy Bahreınge, Túrkııaǵa jáne Ońtústik Koreıaǵa seksýaldyq quldyqqa aparý kanaldary kesildi. Bizde syrtqy jáne ishki adam trafıgi máseleleri kezigedi», - dedi Dýman Taev.
Aıta keteıik, Qazaqstanda 1200 adam iz-tússiz joǵalǵandar sanatynda tur.
