Qazaqstanda adam quqyqtaryna alańdaıtyn sebep joq - Mádenıet jáne aqparat mınıstrligi
ASTANA. Qazannyń 21-i. QazAqparat /Aıdar Ospanalıev/ - Qazaqstan táýelsizdik alǵanyna kóp ýaqyt óte qoıǵan joq. Soǵan qaramastan biz egemendigimizdi alǵan az ǵana jyldar ishinde eldegi birlik pen tynyshtyqty saqtap qala aldyq.
Osynyń barlyǵy memlekette júrigizilip otyrǵan saıasattyń durystyǵyn ańǵartady. Bul týraly búgin Astanada ótip jatqan Qazaqstan Respýblıkasy men Adam quqyqtary jónindegi Eýropalyq Odaq arasyndaǵy qurylymdanǵan dıalog barysynda Mádenıet jáne aqparat mınıstrliginiń Qoǵamdyq-saıası jumys departamentiniń dırektory Baný Nurǵazıeva málim etti, dep habarlaıdy QazAqparat.
Dıalog barysynda sheteldik qonaqtar tarapynan qoıylǵan saýaldarǵa jaýap bergen dırektordyń aıtýynsha, elimizde mıtıngiler men sherýler ótkizý úshin Astanadan eki, Almatydan bir oryn berilgen. «Jaǵdaıdyń bulaısha qalyptasýy qalyń kópshiliktiń qaýipsizdigine baılanysty másele. Ádette, bir adamnyń quqyǵy keńeıgen jerde ekinshi adamnyń quqyǵy shekteledi. Al Almaty men Astana halyqtyń óte kóp shoǵyrlanǵan jeri. Osyǵan oraı onda kólik qozǵalysynyń da adamdardyń da júrip turýy kóp. Sondyqtan qalanyń kez-kelgen aımaǵyn sherý alańyna aınaldyra berýge bolmaıdy. Al Almatyda berilgen jer adamdardyń kóp jınalatyn jerinde ári kólik qımylynan qaýipsizdeý, jaqsy jerde ornalasqan. Sondyqtan bul baǵytta elimizde alańdaıtyndaı eshteńe joq» dedi departament dırektory.
Onyń sózine qaraǵanda, eshbir memlekette jıyndy «qaıda jáne qaı jerde ótkizsem de ózim bilem» degen prıntsıpke jol berilmeıdi. Sondyqtan qazaqstandaǵy mıtıngiler men jıyndardy uıymdastyrýǵa jasalyp otyrǵan múmkindikter halyqaralyq talaptarǵa saı deýge bolady. «Bizde úkimettik emes uıymdarǵa qatysty máseleler de oń sheshimin tapqan. Aǵymdaǵy jyl basyndaǵy málimetter boıynsha respýblıkada 25 myń uıym tirkelgen bolsa, olardyń 17 myńy úkimettik emes uıymdar. Al olardyń arasynda memlekettik tapsyryspen jumys isteımin deýshilerge eshqandaı da shekteý qoıylyp otyrǵan joq» dedi B.Nurǵazıeva.
