Qazaqstanda adam quqyqtaryn saqtaý men qorǵaýdyń ulttyq júıesi qalyptasty - Q.Sultanov
ASTANA. 19 qyrkúıek. QazAqparat - Qazirgi kezde Qazaqstanda adam quqyqtaryn saqtaý men qorǵaýdyń ulttyq júıesi qalyptasty. Bul týraly búgin «2012 jyly Qazaqstan Respýblıkasyndaǵy adam quqyqtarynyń ahýaly týraly» jáne «Qazaqstan Respýblıkasyndaǵy mıgranttar quqyqtarynyń ahýaly týraly» baıandamalarynyń halyqaralyq tusaýkeserinde QR Prezıdenti janyndaǵy Adam quqyqtary jónindegi komıssııanyń tóraǵasy Qýanysh Sultanov málim etti.
«Adam quqyǵy - Qazaqstannyń basym baǵyty, joǵary qundylyǵy. Qazaq halqy ejelden halyqtyq demokratııany ustanǵan. Adamnyń quqyqtary men bostandyqtaryn joǵary qurmettep, bul tetikterdi el basqarýdaǵy úrdisterde, ishki jáne syrtqy saıasatta asqan sheberlikpen qoldana bilgen. Táýelsizdik alǵan sátten bastap Qazaqstan Respýblıkasy adam quqyqtary men bostandyqtaryn qurmetteýge, saqtaý men qorǵaýǵa mindetteme alyp, BUU-nyń quqyǵyna qatynasty 60-tan astam halyqaralyq kelisimsharttaryn ratıfıkatsııalady. Qazirgi kezde Qazaqstanda adam quqyqtaryn saqtaý men qorǵaýdyń ulttyq júıesi qalyptasty», - dedi ol.
Onyń paıymynsha, osy júıeniń mańyzdy quramdas bóligi bolyp sanalatyn Elbasy janyndaǵy Adam quqyqtary jónindegi komıssııa elimizdegi adam quqyqtaryn qorǵaýdyń ulttyq jáne halyqaralyq tetikterin jetildire túsýde óz úlesin qosyp keledi. QR Prezıdenti maquldaǵan komıssııa baıandamalarynda Qazaqstandaǵy adam quqyqtarynyń, munymen qosa eńbek mıgranttary quqyqtarynyń saqtalýyna jan-jaqty taldaý júrgizilip, ulttyq zańnama men quqyq qoldaný praktıkasyn halyqaralyq standarttarǵa sáıkes odan ári jetildirýge qatysty naqty usynymdar berilgen.
