Qazaqstanda adam quqyqtaryn kóbinese jekelegen sheneýnikter buzady - Asqar Shákirov

ASTANA. QazAqparat - Qazaqstanda adam quqyqtaryn kóbinese jekelegen sheneýnikter buzady. Bul týraly búgin Ortalyq kommýnıkatsııalar qyzmetindegi baspasóz máslıhatynda Qazaqstan Respýblıkasyndaǵy Adam quqyqtary jónindegi Ýákil (Ombýdsmen) Asqar Shákirov málim etti.

«Adam quqyqtaryn kóbinese jekelegen sheneýnikter buzady. Bundaı jaǵdaılar kez kelgen saladaǵy kúndelikti qyzmette oryn alady. Sondyqtan da bes ınstıtýtsıonaldy reformalarda mańyzdy aspektilerdiń biri memlekettik apparatty jetildirý bolyp tabylady. Ol memleket aldynda turǵan mindetterdi alǵa jyljytýdy tıisti deńgeıde qamtamasyz etýge qaýqarly. Onyń ishinde álemniń damyǵan 30 eliniń qataryna ený qamtylyp otyr», - dedi Shákirov tilshiler saýalyna jaýap berý kezinde.

Onyń sózine qaraǵanda, búginde memlekettik qyzmetterdi usynbaý, rásimderdi buzý, sondaı-aq nemquraılylyq pen áýre-sarsańǵa salý faktileri, laýazymdy tulǵalardyń áreketsizdigi týraly habarlar Ombýdsmen mekemesine azamattardan kelip túsetin shaǵymdarynyń arasynda 14 paıyzyn qurap otyr. Sonymen birge azamattar ózderiniń aryzdarynda kóbinese naqty zańnamalar men halyqaralyq qujattar aıasyndaǵy quqyqtary taptalǵandyǵyn atap kórsetedi eken.

«Alaıda, jeke laýazymdy tulǵalar, ıaǵnı bárinen buryn jergilikti deńgeıdegiler adamdardyń saýaldary men problemalaryna dáıekti, naqty jaýapty usynýdyń qajettigin eleımeıtindigi jıi kezdesedi», - dep túıindedi Shákirov.