Qazaqstanda adam quqyqtary jónindegi ýákildiń quzireti kúsheıdi

ASTANA. QazAqparat – Elimizde adam quqyqtary jónindegi ýákildiń ókilettigi keńeıdi. Ol týraly QR Ádilet mınıstriniń orynbasary Alma Muqanova aıtyp berdi, dep habarlaıdy QazAqparat tilshisi.

«Adam quqyqtary jónindegi ýákil týraly» Konstıtýtsııalyq zańnyń maqsaty - azamattardyń quqyqtaryn iske asyrýdyń kepili retinde resmı ýákildiń konstıtýtsııalyq mártebesin bekitý boıynsha engizilgen ózgeristerdi iske asyrý. Konstıtýtsııanyń 83-babynyń normalarymen ýákil qyzmetiniń mindetteri men qyzmetiniń táýelsizdigine kepildik bekitilgen. Osylaısha budan bylaı ýákildiń quqyqtyq jaǵdaıy men qyzmetin uıymdastyrý Konstıtýtsııalyq zańmen aıqyndalady», - dedi Alma Muqanova OKQ-de ótken baspasóz máslıhatynda.

Onyń aıtýynsha, adam quqyqtary jónindegi ýákildiń quzyreti kúsheıtilgen.

«Atap aıtqanda, ýákilge azamattardyń quqyqtary men bostandyǵyn qorǵaıtyn normatıvtik quqyqtyq aktilerdiń Konstıtýtsııaǵa sáıkestigi máselesi boıynsha Konstıtýtsııalyq sotqa júginý quqyǵy kózdelgen. Sonymen qatar ýákilge qylmystyq-atqarý júıesi mekemeleri jáne arnaýly áleýmettik qyzmetter kórsetetin uıymdarǵa kedergisiz kirý quqyǵy bekitildi. Ýákildiń memlekettik organdar, jergilikti atqarýshy organdar, ózge de uıymdar men azamattar arasyndaǵy daýlardy retteý jónindegi qoǵamdyq dıalogqa qatysý jáne tıisti usynymdar berý múmkindigi bekitildi», - deıdi ol.