Qazaqstanda adam búıregin satpaq bolǵan qylmystyq top ustaldy
Іshki ister mınıstrligi Uıymdasqan qylmysqa qarsy kúres departamentiniń bastyǵy Qanat Nurmaǵambetov eldegi adam saýdasymen baılanysty qylmystyq isterdiń statıstıkasyn usyndy, dep habarlaıdy Kazinform.
«Jyl basynan beri polıtsııa organdary osy sanattaǵy 124 qylmysty tirkedi. Adam saýdasyna qatysty – 27 fakti, onyń ishinde kámelet jasyna tolmaǵandardy satý – 22. Jezókshelikke tartý - 10 fakti, onyń ishinde kámelet jasyna tolmaǵandardy tartý – 5. Adam aǵzasyn satý – 4 fakti, qanaý maqsatymen bas bostandyǵynan aıyrý – 4. Prıtondar uıymdastyrý, jeńgetaılyq – 79 fakti», - dedi ol vedomstvonyń apta saıyn ótetin brıfıngisinde.
Mınıstrliktiń redaktsııaǵa joldaǵan qosymsha málimetinde aǵza satýmen tutas bir qylmystyq top aınalysqany aıtylǵan.
«ІІM adam aǵzalaryn alyp, satý shemasyn uıymdastyrǵan toptyń qylmystyq áreketiniń jolyn kesti. Polıtsııaǵa 23 adam jetkizildi, olardyń úsheýi qamaýǵa alyndy. Jedel-profılaktıkalyq shara kezinde qosymsha epızod anyqtaldy. Barlyǵy qazaqstandyqtar. Kúdiktiler Almaty, Almaty oblysy, Jambyl oblysy, Túrkistan oblysy aýmaǵynda ustaldyn. Olar adam búıregin satpaq bolǵan», - delingen málimette.
Mınıstrlik ókili «Stop trafık» jedel-aldyn alý sharasy adam saýdasyna qatysty tyń derekter anyqtaǵanyn atap ótti.
«Jýyqta ǵana «Stop trafık» respýblıkalyq jedel-aldyn alý sharasy ótti. Sonyń barysynda 39 qylmys áshkere boldy. Onyń ishinde bireýi adam aǵzasyn satýmen baılanysty. Eńbekti qanaý maqsatymen adamdy zańsyz bas bostandyǵynan aıyrýdyń 3 faktisi anyqtaldy. Adam saýdasynyń 7 jaǵdaıy tirkeldi. Onyń ishinde beseýi kámelet jasyna tolmaǵandardy satqan. Jezókshelikke ıtermeleýdiń 4 faktisi áshkere boldy. Onyń ishinde úsheýi kámelet jasyna tolmaǵan. Sondaı-aq prıton uıymdastyryp, jeńgetaılyqpen aınalysýdyń 24 deregi anyqtaldy.
Jezókshelik pen jeńgetaılyq uıymdastyrylatynyn bile otyryp ǵımaratty jalǵa usynǵany úshin 51 ákimshilik quqyq buzý faktisi tirkeldi. Sonymen birge qoǵamdyq orynda mazany alýdyń 708 oqıǵasy anyqtaldy», - dedi Qanat Nurmaǵambetov.
