Qazaqstanda ABB-yn engizý arqyly aýrýlardyń asqynýy men ólim-jitim kórsetkishi 10%-ǵa tómendeıdi - DSÁDM

ASTANA. QazAqparat - Aýrýlardy basqarý baǵdarlamasy Astana, Almaty qalalarynda, BQO, Qaraǵandy, Qostanaı oblystarynda júzege asyryla bastaıdy. Jalpy alǵanda, 3200-den astam adamdy qamtý josparlanyp otyr. Baǵdarlamany engizý nátıjesinde aýrýlardyń asqynýy men ólim-jitim kórsetkishin 10%-ǵa tómendetý, alǵashqy medıtsınalyq-sanıtarlyq kómek uıymdaryndaǵy júktemeni azaıtý, statsıonarlyq jáne jedel medıtsınalyq kómekke zárýlikti tómendetý - basty maqsat. Bul týraly QR Densaýlyq saqtaý jáne áleýmettik damý mınıstrliginde Aýrýlardy basqarý baǵdarlamasyn taqyrybynda ótken brıfıngte Densaýlyq saqtaýdy damytý respýblıkalyq ortalyǵy bas dırektorynyń mindetin atqarýshy Tileýhan Ábildaev málimdedi.

Ol óz sózinde álemdik statıstıkaǵa sáıkes sozylmaly juqpaly aýrýlar dúnıejúzi túrǵyndarynyń densaýlyǵyna, onyń ishinde Qazaqstan azamattaryna da zor qaýip týyndatatynyn atap ótti. Olar ýaqytynan buryn bolatyn ólim-jitimge sebep bolyp, múgedektikke, tolyqqandy ómir súrý uzaqtyǵyna aıtarlyqtaı áser etedi.

Atalǵan qaýip-qaterlerdi tómendetý úshin álemniń 30-dan astam elderinde medıtsınalyq kómek kórsetýdiń profılaktıkalyq jáne júıeli tártibine negizdelgen Aýrýlardy basqarý baǵdarlamasy engizilýde.

Qazaqstanda ABB 2013 jyldan bastap Soltústik Qazaqstan jáne Pavlodar oblystaryndaǵy 7 emhanada arterıaldyq gıpertenzııa, sozylmaly júrek kemistigi jáne qant dıabeti syndy úsh nozologııa boıynsha júzege asyrylýda.

ABB-nyń 1213 qatysýshylarymen kelisim jasalyp, patsıentter júrgizetin ózin-ózi baqylaý kúndelikteri berildi. Kelisimge sáıkes, medıtsınalyq uıymdar ABB qatysýshysy-patsıentpen únemi baılanysta bola otyryp, patsıentke dınamıkalyq baqylaý jasaıtyn mýltıdıstsıplınarlyq komandalardy qurady.

Emhanalar janynda patsıentterdi ózine-ózi kómek kórsetý qaǵıdalaryna, óz densaýlyǵyna durys qarym-qatynas jasaýǵa úıretetin, salaýatty ómir salty men ózdiginen bilim alý boıynsha aqparattyq materıaldarmen qamtamasyz etetin densaýlyq mektepteri jumys isteıdi.

Іlki jobany júzege asyrý nátıjesinde patsıentterdiń 75 paıyzynda arterıaldyq gıpertenzııa deńgeıiniń kórsetkishi turaqtalyp, arterıaldyq qysymdy baqylaý jáne gıpotenzıvti preparattardy turaqty turde qabyldaý mashyqtarynyń qalyptasýy baıqaldy. Sozylmaly júrek kemistigi bar patsıentterdi aýrýhanaǵa jatqyzý jaǵdaıy 2 esege azaıdy.  Qant dıabetin anyqtaýǵa tekserilgen adamdar sany ulǵaıdy.

Pılottyq aımaqtardaǵy ABB-ny engizýdiń tıimdi tájirıbesin eskere otyryp, ABB-ny júzege asyrý bıylǵy jyly Astana, Almaty qalalarynyń, BQO, Qaraǵandy, Qostanaı oblystarynyń emhanalarynda júzege asyrylatyn bolady.

«Jalpy alǵanda, 3200-den astam adamdy qamtý josparlanyp otyr. Baǵdarlamany engizý nátıjesinde aýrýlardyń asqynýy men ólim-jitim kórsetkishin 10%-ǵa tómendetý, alǵashqy medıtsınalyq-sanıtarııalyq kómek uıymdaryndaǵy júktemeni azaıtý, statsıonarlyq jáne jedel medıtsınalyq kómekke zárýlikti tómendetý kútiledi», - dedi ol T.Ábildaev.