Qazaqstanda AÁK taǵaıyndaǵanda azamattardyń kredıti men depozıti eskeriledi
ASTANA. KAZINFORM – Qazaqstanda ataýly áleýmettik kómek taǵaıyndaý kezinde otbasynyń tabysymen qatar banktik qaryzdary, depozıtteri men qarjylyq operatsııalary da eskeriledi. Bul týraly Eńbek jáne halyqty áleýmettik qorǵaý mınıstrligi Kazinform agenttiginiń resmı saýalyna bergen jaýabynda habarlady.
Vedomstvonyń málimetinshe, áleýmettik kómektiń ataýlylyǵyn arttyrý maqsatynda AÁK taǵaıyndaý jáne tóleý qaǵıdalaryna otbasynyń qarjylyq jaǵdaıyn baǵalaýǵa qatysty qosymsha ólshemder engizilgen.
– Atap aıtqanda, azamattardyń banktik qaryzdary men mıkrokredıtteri, bank shottary boıynsha shyǵys operatsııalary, sondaı-aq jınaq salymdary men depozıtteri nazarǵa alynady. Bul ózgerister otbasynyń materıaldyq jaǵdaıyn tek resmı tabysyna qarap emes, onyń shyǵystary men qolda bar qarjylyq resýrstary negizinde baǵalaýǵa baǵyttalǵan, - delingen jaýapta.
Sonymen qatar aqparattyq júıelerdegi derekterdi paıdalaný jáne ýchaskelik komıssııalardyń jumysyn tsıfrlandyrý arqyly otbasylardyń materıaldyq jaǵdaıyn baǵalaý tártibi jetildirilgen.
Vedomstvonyń túsindirýinshe, bul sharalar áleýmettik kómektiń shynymen muqtaj otbasylarǵa taǵaıyndalýyn qamtamasyz etýge múmkindik beredi.
Aıta keteıik, Úkimet qaýlysymen memlekettik ataýly áleýmettik kómektiń mólsherin, kórsetý sharttaryn jáne ony kórsetýge qajettilik joq ekeni týraly qorytyndy shyǵarý ólshemsharttary aıqyndaldy.
