Qazaqstanda AÁK alýshylar sany bes jylda 70%-ǵa azaıdy
ASTANA. KAZINFORM — Qazaqstanda sońǵy bes jylda ataýly áleýmettik kómek (AÁK) alýshylar sany 70,4 paıyzǵa qysqardy. Bul týraly Eńbek jáne halyqty áleýmettik qorǵaý mınıstrligi Kazinform agenttiginiń resmı saýalyna bergen jaýabynda málimdedi.
Mınıstrliktiń málimetinshe, 2021 jyly 198,4 myń otbasyndaǵy 990,5 myń adamǵa ataýly áleýmettik kómek taǵaıyndalǵan. 2022 jyly bul kórsetkish 728,7 myń adamǵa, 2023 jyly 598,4 myń adamǵa deıin tómendegen.
— 2024 jyly 413,7 myń adamdy qurasa, 2025 jyly 54,4 myń otbasyndaǵy 292,7 myń adamǵa deıin azaıǵan. Osylaısha, 2021-2025 jyldar aralyǵynda áleýmettik kómek alýshylar sany 70,4%-ǵa, al ony alatyn otbasylar sany 72,6%-ǵa qysqarǵan, — delingen jaýapta.
Al 2026 jylǵy 1 qazandaǵy jaǵdaı boıynsha 41 252 otbasyndaǵy 222 312 adamǵa ataýly áleýmettik kómek taǵaıyndaldy. Mınıstrlik usynǵan málimetke sáıkes, áleýmettik kómek alýshylardyń basym bóligin balalar quraıdy. Atap aıtqanda, olardyń 152 154-i nemese 68,4 paıyzy — 18 jasqa deıingi balalar.
— Sonymen qatar AÁK alýshylar arasynda ótinish bergen kezde jumysy bar 28 045 azamat tirkelgen. Bul jalpy alýshylardyń 12,6 paıyzyna teń. Al zeınetkerlerdiń sany 505 adamdy nemese 0,2 paıyzdy quraıdy. Áleýmettik kómek taǵaıyndalǵan otbasylardyń 21 864-i — kópbalaly otbasylar. Olardyń úlesi 53 paıyzǵa jetti, — delingen vedomstvo jaýabynda.
Mınıstrlik bul kórsetkishter ataýly áleýmettik kómek alýshylardyń quramyn sıpattaıtynyn atap ótti.
Aıta keteıik, ataýly áleýmettik kómek jan basyna shaqqandaǵy ortasha tabysy óńirde belgilengen kedeılik sheginen tómen otbasylarǵa taǵaıyndalady. Onyń mólsheri kedeılik shegi men otbasynyń jan basyna shaqqandaǵy ortasha tabysynyń aıyrmasy negizinde árbir otbasy múshesine esepteledi.
Buǵan deıin AÁK alatyn otbasylarǵa jumys tabýǵa da múmkindik beriletinin jazǵanbyz.
