Qazaqstanda «A» korpýsynyń memlekettik qyzmetshileri qaıta oqytylady

NUR-SULTAN. QazAqparat – QR Prezıdenti janyndaǵy Memlekettik basqarý akademııasynda «A» korpýsynyń memlekettik qyzmetshilerin qaıta daıarlaý kýrstary bastaldy, dep habarlaıdy QazAqparat tilshisi agenttiktiń baspasóz qyzmetine silteme jasap.

Kýrsty Memlekettik basqarý akademııasy men Nazarbaev Ýnıversıteti uıymdastyryp otyr.

Baǵdarlamaǵa memlekettik basqarý, kadr saıasaty, sheshim qabyldaý júıesi tásilderin jáne basqa da birqatar basym máselelerdi ózgertý boıynsha aldyna mańyzdy mindetter qoıylǵan tájirıbeli, qalyptasqan iri qurylymdardyń basshylary qatysýda.

Agenttik tóraǵasy Anar Jaıylǵanovanyń aıtýynsha, atalǵan kýrs QR Tuńǵysh Prezıdenti – Elbasy N.Á. Nazarbaevtyń qoǵam qajettilikterine baǵyttalǵan zamanaýı memlekettik apparat talaptaryna jaýap beretin basshylardy daıarlaý týraly tapsyrmasyn iske asyrý maqsatynda júrgizilip jatyr.

«Strategııalyq kóshbasshylyq, ózgeristerdi basqarý jáne tıimdi kommýnıkatsııalar syndy quzyretter Prezıdent Q.K. Toqaevtyń Joldaýynda qoıylǵan mindetterdi jedel jáne sapaly sheshý úshin mańyzdy. Ásirese, ekonomıkalyq ósý qarqynyn qalpyna keltirý, halyqtyń ómir súrý sapasyn jaqsartý qajettigi men memlekettik organdar qyzmetiniń tıimdiligin túbegeıli arttyrý jaǵdaıynda óte ózekti. Memlekettik basqarý men qoǵamdyq damýdaǵy júıeli ózgeristerdiń zamanaýı trendteri men joǵary qarqyny eldiń strategııalyq mindetterin tıimdi sheshý úshin ınnovatsııalyq jáne ınklıýzıvti oılaý qabileti bar basshylardyń jańa býynyn qalyptastyrýdy talap etedi», - deıdi Anar Jaıylǵanova.