Qazaqstanda 980 myńnan astam azamat turǵyn úıge muqtajdar esebinde tur
ASTANA.KAZINFORM — Qazaqstanda birinshi jartyjyldyqta 8 649 jalǵa beriletin páter bólindi, onyń ishinde 5361 turǵyn úı jekeshelendirildi. QR Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Qanat Myńbaev jaldamaly turǵyn úıdi bólý tetikteri týraly baıandady.
Derekterge sáıkes, jalpy el boıynsha 980 myńnan astam azamat turǵyn úıge muqtaj retinde esepte tur. Olar úshin jalǵa beriletin turǵyn úı jáne jeńildetilgen ıpotekalyq qaryzdar túrindegi memlekettik qoldaý sharalary kózdelgen.
Jaldamaly turǵyn úı tabysy tómen nemese tabysy joq azamattarǵa kezek retimen jáne otbasy músheleriniń sanyna sáıkes beriledi. Jaldamaly turǵyn úı mynadaı tártippen: turǵyn úıdiń jalpy kóleminiń 20%-y jetim balalar arasynda, 50%-y birinshi kezektegi quqyǵy bar azamattardyń 7 sanaty arasynda bólinedi. Qalǵan úıler turǵyn úı kezeginde turǵan ózge azamattarǵa beriledi.
Jalǵa beriletin turǵyn úıdi alý kezinde turǵyn úıdi jaldaý sharty jasalady. Osy shart negizinde otbasy turǵyn úıge muqtaj mártebesin saqtaǵan kezeńde páterde merzimsiz tura alady. Turǵyn úıdi paıdalaný kezinde turǵyn úı zańnamasynyń talaptary men jaldaý shartynyń talaptary saqtalǵan jaǵdaıda, azamattardy turǵyn úıden shyǵarýǵa negiz bolmaıdy.
— Eger azamattar jaldamaly turǵynjaıdan bólek menshigine úı alsa, onda olar jaldamaly turǵyn úıdi ákimshilikke qaıtarý kerek. Jalǵa alýshy azamat qaıtys bolǵan jaǵdaıda, turǵyn úı otbasy múshelerine ótedi. Jekeshelendirý kezinde azamattar jalǵa berilgen turǵyn úıdi qaldyq quny boıynsha birden nemese 15 jylǵa deıin bólip tóleý arqyly satyp ala alady. Sondaı-aq turǵyn úı zańnamasynda aıqyndalǵan keıbir azamattar jaldamaly turǵyn úıdi óteýsiz jekeshelendire alady. Bıylǵy 6 aıda 8649 turǵyn úı bólindi. Onyń 5361-i jekeshelendirilgen, — dep túsindirdi QR Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Qanat Myńbaev. Sondaı-aq ol jekeshelendirýdiń erikti tańdaý ekenin atap ótti.
Kelesi memlekettik qoldaý sharasy — jeńildetilgen ıpotekalyq qaryzdar.
Jeńildetilgen ıpotekalyq qaryzdar «Otbasy bank» arqyly 2% jáne 5% mólsherlememen beriledi. Azamattardyń 8 sanatyna, ıaǵnı UOS ardagerleri, jetim balalar, kóp balaly analar men otbasylar, 1 jáne 2 toptaǵy múgedektigi bar adamdar, múgedektigi bar balalary bar otbasylar, basqa memleketter aýmaǵyndaǵy bo qımyldarynyń ardagerleri, jeńildikteri boıynsha UOS ardagerleri men jesirlerge teńestirilgen ardagerlerge 2% mólsherlememen beriledi.
Jeńildetilgen ıpotekanyń bastapqy jarnasyn óteý úshin azamattarǵa qaıtarymsyz turǵyn úı sertıfıkaty túrinde qoldaý qarastyrylǵan. Jartyjyldyq qorytyndysy boıynsha 1976 sertıfıkat tabystaldy. Sertıfıkat alýshylar sanattarynyń tizbesi jáne mólsheri máslıhattar sheshimimen aıqyndalady.
Al Qazaqstanda baspana baǵasy qalaı ózgerip jatqanyn myna siltemeden oqyńyz.
