Qazaqstanda 953 saýda bazary jumys jasaıdy
ALMATY. Jeltoqsannyń 1-i. QazAqparat /Erlik Erjanuly/ - Qazaqstan bazarlaryndaǵy saýda oryndarynyń jalpy sany 175,1 myń danany quraıdy. Onda 164,4 myń adam jumys jasaıdy. Bul búgin Almatyda ótip jatqan Qazaqstannyń saýda kásiporyndarynyń І kongresinde aıtyldy,
dep habarlaıdy QazAqparat.
Qazaqstannyń bazarlar men saýda jáne qyzmet salasyndaǵy kásiporyndar qaýymdastyǵynyń prezıdenti Jibek Ájibaevanyń aıtýynsha, statıstıka boıynsha respýblıkada 953 saýda bazarlary jumys jasaıdy. Olar túri boıynsha - ámbebap, kóterme, shaǵyn-kóterme, bólshek saýda dep bólinedi. Onyń 478-i ámbebap, 116-sy azyq-túliktik, 178-i azyq-túliktik emes, 181-i mamandandyrylǵan bazarlar. Bólshek saýda aınalymy kólemindegi jeke kásipkerlerdiń úlesi 22,3 paıyzdy quraıdy.
«Qazaqstan naryǵyndaǵy uıymdasqan rıteıl árqıyly kózderde 5 pen 10 paıyzdyń aralyǵynda. Jalpy ishki ónimdegi bólshek saýdanyń úlesi 15 paıyzǵa jýyqtaıdy. Byltyr árbir turǵynǵa shaqqanda bólshek saýda 1 myń dollardy quraǵan bolatyn. Bıyl alǵashqy toqsanda ol ótken jyldyń sáıkes kezeńimen salystyrǵanda 10 paıyzǵa tómendedi. Jalpy ulttyq taýar aınalymynyń 50 paıyzǵa jýyǵy Astana men Almaty qalalarynyń úlesine tıedi», deıdi Jibek Ájibaeva.
