Qazaqstanda 95 kásiporynda eńbek daýy qaralyp jatyr

ASTANA. KAZINFORM – Elimizde kásiporyndardaǵy eńbek jaǵdaıyna monıtorıng júrgizilip jatyr. Ol týraly tolyǵyraq Eńbek jáne halyqty áleýmettik qorǵaý mınıstrligi memlekettik eńbek ınspektsııasy komıtetiniń tóraǵasy Meırambek Ahmetov aıtyp berdi.

- Bıyl 1 qarashadaǵy jaǵdaı boıynsha respýblıkadaǵy áleýmettik shıelenis qaýpi joǵary 1,8 myń kásiporyn monıtorıngige engizildi. Árbir «joǵary táýekeldi» kásiporyn boıynsha áleýmettik shıelenisti boldyrmaý maqsatynda mınıstrlik tarapynan nysanaly aldyn alý jumysy atqarylyp jatyr, - dedi Meırambek Ahmetov ortalyq kommýnıkatsııalar qyzmeti alańynda ótken baspasóz máslıhatynda.

Eńbek ınspektsııasy komıteti tóraǵasynyń aıtýynsha, monıtorıng iske qosylǵaly beri 100 myńnan astam jumysshyny eńbekpen qamtyp otyrǵan 3,2 myń kásiporyn joǵary táýekel aımaǵynan shyǵarylǵan.

- Jyl basynan beri keshendi sharany iske asyrýdyń nátıjesinde 55 ujymdyq eńbek daýy sheshildi. Búginde 95 kásiporynda jaǵdaıdy turaqtandyrý boıynsha jumys júrgizilip jatyr, - deıdi spıker.

Sondaı-aq Eńbek jáne halyqty áleýmettik qorǵaý mınıstrliginiń ókili Mańǵystaý oblysynda 3 jáne odan da kóp saǵatqa jumysty toqtatqan 11 jumysshylar ereýili bolǵanyn aıtty.

- Qazir barlyq ereýil retteldi, - dep túıindedi M.Ahmetov.

Aıta ketsek, memlekettik eńbek ınspektsııasy komıtetiniń málimeti boıynsha kóbine taý-ken metallýrgııa salasynda eńbek etetin jandar jumys ornynda jaraqat alady eken. 

Buǵan deıin habarlaǵanymyzdaı, jyl basynan beri eńbek qaýipsizdigin saqtamaǵan jumys berýshilerge 428 mln teńgeden astam aıyppul salynǵan. 

Sondaı-aq brıfıng barysynda jumysshylar aldynda jalaqy qaryzy kóp óńirler ataldy.