Qazaqstanda 940 adam radıkaldy raıynan qaıtty
QMDB Dinı ister jáne taldaý bóliminiń málimetine sáıkes, elimiz boıynsha 940 adam dástúrli Ábý Hanıfa mázhabyna qaıtqan. Dástúrli dinı mektepti tańdaǵan azamattar sany boıynsha Aqtóbe oblysy birinshi orynda. Oblys boıynsha 308 adam radıkaldy dinı kózqarasyn ózgertkenin resmı málimdegen. Almaty qalasy boıynsha 127 adam radıkaldy dinı raıynan qaıtqan. Qaraǵandy oblysynda 123 adam hanafı mázhabyn tańdaǵan.
«Jat aǵymǵa ketken azamattarǵa ýaǵyz-nasıhat, túsindirý sharalaryn júrgizý - Qazaqstan musylmandary dinı basqarmasynyń negizgi jumys baǵyttarynyń biri. Bul baǵyt boıynsha jumystar jyl saıyn jandanyp keledi. Imamdar teris jolǵa túsken azamattarmen birneshe saǵat suhbattasady, kezdesedi, túsindirý sharalaryn júrgizedi. Sonymen qatar, din qyzmetkerleri destrýktıvti dinı aǵym ókilderi arasynda mádenı, rýhanı, sporttyq is-sharalar uıymdastyryp keledi. Maqsat - jamaǵatty meshit tóńiregine toptastyrý, birlikke, izgilikke uıytý. Sonyń nátıjesinde 940 adam dástúrli dinge oraldy. Bul baǵyttaǵy jumys jyl boıy jalǵasa beredi», - dep atap ótti Bas múftı Erjan qajy Malǵajyuly.
Jyldyq qorytyndy jınalysta 2018 jyldyń jumys jospary bekitilip, oblystyń bas ımamdaryna naqty tapsyrmalar berildi.
