Qazaqstanda 9,4 mln adamnyń turaqty jumysy bar
ASTANA. KAZINFORM — 2026 jyldyń birinshi toqsanynyń qorytyndysy boıynsha jumyspen qamtylǵandar sany 9 mln 392 myń adamǵa jetip, byltyrǵy osy kezeńmen salystyrǵanda 108,5 myń adamǵa artty.
Eńbek jáne halyqty áleýmettik qorǵaý mınıstrliginiń málimetinshe, ósimniń negizgi úlesi eńbek sharty negizinde jumys isteıtin jaldamaly jumyskerler sanynyń kóbeıýi esebinen qamtamasyz etildi. Olardyń sany 7 mln 140,9 myńnan 7 mln 290,4 myń adamǵa deıin ósip, shamamen 150 myń adamǵa ulǵaıdy.
— Resmı jumyspen qamtýdyń artýy — ekonomıkanyń turaqtylyǵyn aıqyndaıtyn mańyzdy kórsetkishterdiń biri. Óıtkeni eńbek sharty boıynsha jumys isteıtin azamattar áleýmettik jáne eńbek kepildikteriniń tolyq paketimen qamtylady. Olardyń qatarynda mindetti áleýmettik saqtandyrý, zeınetaqy jarnalarynyń aýdarylýy, jyl saıynǵy aqyly eńbek demalysy, eńbekke ýaqytsha jaramsyzdyq boıynsha tólemder jáne eńbek quqyqtarynyń qorǵalýy bar, — delingen habarlamada.
Sonymen qatar turaqtylyǵy tómen jumyspen qamtý túrleriniń úlesi de azaıyp keledi. Bir jyl ishinde ózin-ózi jumyspen qamtyǵandardyń sany 2 mln 142,5 myńnan 2 mln 101,6 myń adamǵa deıin qysqardy. Al táýelsiz jumyskerlerdiń sany 357,2 myńnan 326,6 myń adamǵa deıin, ıaǵnı 30 myńnan astam adamǵa azaıdy. Bul azamattardyń birtindep ekonomıkanyń resmı sektoryna aýysyp, áleýmettik kepildikter júıesimen qamtylýynyń keńeıip kele jatqanyn kórsetedi.
Oń ózgerister jumyssyzdyq kórsetkishterinen de baıqalady. Jumyssyzdar sany 446 myń adamǵa deıin tómendep, jumyssyzdyq deńgeıi 4,5% deńgeıinde saqtaldy. Jastar arasyndaǵy jumyssyzdyq deńgeıi 3% boldy.
Eske salaıyq, buǵan deıin jyl basynan beri 250 myńǵa jýyq adam jumyspen qamtylǵanyn jazǵanbyz.
