Qazaqstanda 93 memlekettik qyzmetshi jasandy ıntellekt boıynsha oqyp jatyr
ASTANA. KAZINFORM — QR Prezıdentiniń janyndaǵy Memlekettik basqarý akademııasynyń bazasynda basshylardy AI Governance 500 strategııalyq baǵdarlamasy boıynsha oqytýdyń ekinshi legi bastaldy. Bul týraly akademııanyń baspasóz qyzmeti málim etti.
Memleket basshysy 2026 jyldy Tsıfrlandyrý jáne jasandy ıntellekt jyly dep jarııalady. Bul memlekettik basqarýdy tsıfrlyq transformatsııalaý úderisine tartylǵan kadrlardy júıeli túrde daıarlaýdyń mańyzdylyǵyn kórsetedi.
AI Governance 500 baǵdarlamasyn QR Memlekettik qyzmet isteri agenttigi QR Prezıdenti Ákimshiligi Basshysynyń tapsyrmasy boıynsha Jasandy ıntellekt jáne tsıfrlyq damý mınıstrligimen birlesip júzege asyrýda. Oqytý memlekettik sektorda jasandy ıntellektini aýqymdy engizý maqsatynda uıymdastyryldy.
Bıyl qańtar aıynda alǵashqy lekte 99 memlekettik qyzmetshi oqytýdan ótti, baǵdarlamanyń ekinshi legine 93 basshy qatysyp jatyr. Sharanyń ashylýyna Qazaqstan Respýblıkasy Prezıdentiniń keńesshisi Qýanyshbek Esekeev, Premer-Mınıstrdiń orynbasary – Jasandy ıntellekt jáne tsıfrlyq damý mınıstri Jasulan Madıev, QR Memlekettik qyzmet isteri agenttiginiń tóraǵasy Darhan Jazyqbaı qatysty.
— AI Governance 500 baǵdarlamasy vedomstvoaralyq tsıfrlyq jobalardy bastaýǵa jáne súıemeldeýge, olardyń arhıtektýralyq úılesimdiligin qamtamasyz etýge, sondaı-aq Digital Kazakhstan tujyrymdamasy aıasynda memlekettik kún tártibiniń strategııalyq maqsattaryna qoljetkizýge qabiletti tsıfrlyq basshylar – AI-ofıtserlerdiń turaqty kadrlyq pýlyn qalyptastyrýdy kózdeıdi, — delingen habarlamada.
Oqytýǵa Úkimet Apparatynyń qurylymdyq bólimsheleriniń, Qazaqstan Respýblıkasy Prezıdenti Іs basqarmasy basshylary, Quryltaı depýtattary, salalyq vıtse-mınıstrler, oblys ákimderiniń orynbasarlary, ortalyq memlekettik organdar men jergilikti atqarýshy organdar apparattarynyń basshylary, máslıhat tóraǵalary qatysyp jatyr.
Aıta keteıik, buǵan deıin jasandy ıntellekt eldiń 2,5 myń aýyl mektebine engiziletinin jazdyq.
