Qazaqstanda 93 kásibı gıdke biryńǵaı beıdj tabystaldy

ASTANA. KAZINFORM — Tirkeýden jáne testileýden sátti ótken gıdterge olardyń mártebesi men kásibı daıarlyǵyn rastaıtyn biryńǵaı standarttaǵy resmı beıdj tabystalady, dep habarlaıdy Týrızm jəne sport mınıstrligi.

Týrıstik qyzmetterdiń sapasyn arttyrý jáne ekskýrsııalyq súıemeldeý salasyndaǵy ashyqtyqty qamtamasyz etý maqsatynda Qazaqstanda gıdterdiń qyzmetin júıeli retteýge baǵyttalǵan tsıfrlyq modýl engizildi. Atalǵan modýl arqyly paıdalanýshylar gıdter týraly tekserilgen aqparatty ala alady, al gıdter ózderiniń kásibı biliktiligin rastap, testileýden ótip, qosymsha bilim alý múmkindigine ıe bolady.

— Tirkeýden jáne testileýden sátti ótken gıdterge olardyń mártebesi men kásibı daıarlyǵyn rastaıtyn biryńǵaı standarttaǵy resmı beıdj tabystalady. Qazirgi tańda mundaı beıdjdi 93 gıd ıelenip otyr. Bilikti mamandardy qoldaý bastamasy aıasynda elimiz boıynsha 41 týrıstik nysanǵa jeńildikpen kirý múmkindigi usynylyp otyr. Jeńildik gıdter men olardyń alyp júretin uıymdastyrylǵan týrıstik toptaryna arnalǵan, — delingen mınıstrlik habarlamasynda.

Óńirler bólinisi boıynsha:

Almaty oblysy — 17 nysan, onyń ishinde «Kólsaı kólderi», «Sharyn» shatqaly, «Іle-Alataý» ulttyq parki, sondaı-aq mýzeıler men qoryqtar;

Astana qalasy — 9 nysan, sonyń ishinde «Báıterek» monýmenti, «Astana Opera» teatry, Ulttyq mýzeı;

Almaty qalasy — «Shymbulaq» kýrorty, Á. Qasteev atyndaǵy Memlekettik óner mýzeıi, «Ǵylym ordasy» mýzeıi jáne Ortalyq memlekettik mýzeıde jeńildik qarastyrylǵan;

Soltústik Qazaqstan oblysy — «Botaı» mýzeı-qoryǵy;

Jetisý oblysy — «Altyn-Emel» ulttyq parki men Jetisý Alataýy memlekettik tabıǵı parki.

Buǵan deıin elimizde balalar men jasóspirimder týrızmin damytýdyń jol kartasy ázirlengenin jazdyq.