Qazaqstanda 92 mıllıon gektar aýyl sharýashylyǵy jeriniń 7 mıllıonnan astamy paıdalanylmaıdy
ASTANA. QazAqparat - Qazaqstanda jalpy kólemi 92 mıllıon gektardy quraıtyn aýyl sharýashylyǵy maqsatyndaǵy jerdiń 7 mıllıonnan astamy paıdalanylmaıdy. Bul týraly búgin Senatta «Elbasy N.Nazarbaevtyń Qazaqstan halqyna Joldaýy aıasynda Qazaqstan Respýblıkasynda aýyl sharýashylyq jerlerin paıdalaný jaǵdaıy jáne jer resýrstaryn basqarý zańnamasyn jetildirý» taqyrybyna arnalǵan dóńgelek ústel barysynda málim boldy.
Jıyn barysynda Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Sergeı Plotnıkov Qazaqstannyń álemdik ekonomıkaǵa belsendi enýi, onyń básekege qabilettiligin arttyrý, sondaı-aq elimizdiń azyq-túlik qaýipsizdigin qamtamasyz etý jer resýrstaryn tıimdi paıdalanýǵa eleýli túrde baılanysty ekenine nazar aýdardy. Depýtattyń aıtýynsha, jer kólemi boıynsha Qazaqstan álemdegi iri memleketterdiń ondyǵyna kiredi, al jermen qamtamasyz etý deńgeıi jan basyna shaqqanda Aýstralııa men Kanadadan keıin álemde úshinshi oryn alady. «Aýyl sharýashylyǵyna arnalǵan jer erekshe quqyqqa ıe jáne osy sıpattaǵy jer kólemi elimizdiń jer qorynyń quramynda 98,6 mıllıon gektar nemese elimizdiń jalpy aýmaǵynyń 36 paıyzyn quraıdy. Sonymen qatar, qazirgi tańda jeke jáne zańdy tulǵalarǵa berilgen jerdiń paıdalanylmaýy eń kókeıkesti másele bolyp otyr. Elimizdiń ulttyq ekonomıka mınıstrliginiń aqparaty boıynsha 2012-2014 jyldarda júrgizilgen jerdi túgendeý qorytyndysyna sáıkes, jalpy kólemi 92 mıllıon gektar aýyl sharýashylyǵy jeriniń 7 mıllıonnan astamy paıdalanylmaıtyny anyqtaldy», - dedi senator.
Jıyn barysynda jer tóńiregindegi birqatar ózekti máseleler sóz boldy. Osyǵan qatysty múddeli mınıstrlik ókilderiniń baıandamasynan soń Senat depýtattary birqatar usynystaryn jetkizdi.
Atap aıtqanda, senatorlar Úkimetke agroónerkásip kesheni sýbektilerin memlekettik qoldaýdyń qolǵa alynǵan sharalarymen qatar «Agrobıznes - 2020» baǵdarlamasymen memlekettik qoldaýdyń jańa sharalaryn júzege asyrýdy usynady. Budan bólek, qazirgi zamanǵy agrotehnologııa óndirisin engizý, tuqym sharýashylyǵyn damytý arqyly aýyl sharýashylyǵy daqyldarynyń ónimdiligi men óndirisin ulǵaıtý jónindegi jumystardy jalǵastyrý qajet dep sanaıdy.
