Qazaqstanda 904 bala koronavırýstan emdelip jatyr

NUR-SULTAN. QazAqparat - Qazirgi ýaqytta koronavırýstyq ınfektsııadan 13 827 adam em qabyldaýdy jalǵastyrýda. Bul týraly QazAqparat Densaýlyq saqtaý mınıstrligine silteme jasap habarlaıdy.

« Olardyń arasynda 904 bala bar. Statsıonarlarda 3 541 naýqas jatyr. 10 286 adam ambýlatorııalyq jaǵdaıda emdelýde.

Jalpy naýqastardyń arasynda 218 adamnyń ahýaly nashar. Sonyń ishinde 35 naýqastyń ahýaly asa qatty aýyr dep baǵalanýda. 31 naýqas ókpeni jasandy jeldetý apparatynda jatyr», - delingen habarlamada.