Qazaqstanda 900-ge jýyq brıtandyq kompanııa jumys isteıdi
ASTANA. QazAqparat - Májilis tóraǵasy Nurlan Nyǵmatýlın Ulybrıtanııa jáne Soltústik Irlandııa Birikken Koroldiginiń Qazaqstandaǵy Tótenshe jáne Ókiletti elshisi Kerolın Braýndy qabyldady.
Áńgime aıasynda taraptar «Qaýipsiz, ádil jáne gúldengen álem qurý úshin jahandyq seriktestikti nyǵaıtýdaǵy Qazaqstannyń tujyrymdamalyq kózqarasy» saıası úndeýin alǵa tarta otyryp, Qazaqstannyń BUU Qaýipsizdik Keńesindegi jumysynyń basymdyqtaryna toqtaldy, dep habarlady Májilis Apparatynyń baspasóz qyzmetinen.
Kezdesý kezinde aıryqsha kóńil aýdarylǵan taqyryptyń biri - Qazaqstan Prezıdenti Nursultan Nazarbaevtyń bastamshylyǵymen júrgiziligen bılik tarmaqtary arasynda ókilettikterdi qaıta bólý máselesi.
Elshi hanym jańa bastamany Qazaqstannyń turaqty damýy jolyndaǵy mańyzdy qadam dep baǵalaı otyryp, elimizde júrigizilgen konstıtýtsııalyq reformaǵa baılanysty jyly lebizin jetkizdi.
Májilis spıkeri eki el arasyndaǵy qarym-qatynasqa jiti kóńil bóle kelip, ótken jyly syrtqy saýda aınalymynyń 1,2 mlrd. dollardy quraǵandyǵyn atap ótti.
Qazaqstanda 860 brıtandyq bıznes kompanııalary tirkelgendigin alǵa tartqan N. Nyǵmatýlın: «Biz jańa ekonomıkalyq saıasat jáne ındýstrııalyq-ınnovatsııalyq damý baǵdarlamasy aıasynda Qazaqstanda ınnovatsııalyq jobalardy júzege asyrý úshin brıtandyq kapıtaldyń qatysýyna múddelimiz»,- dedi.
Júzdesý barysynda Astanada ótetin «EKSPO - 2017» halyqaralyq kórmesi de nazardan tys qalmady.
Osy rette Májilis tóraǵasy brıtandyq pavılon qazaqstandyqtar men sheteldik qonaqtardyń erekshe yqylasyna ıe bolatynyna senim bildirdi.
Sonymen qatar, taraptar zań shyǵarý jumysynda parlamentaralyq baılanystardy tereńdetýdiń mańyzdylyǵyna kóńil bólip, tájirıbe almasýdyń túrli joldaryn atap ótti.
