Qazaqstanda 9 sý tuşytý zaýyty salynady
«Elimizdiń soltústik bóliginde, ásirese geografııalyq turǵyda tuşy sý kózderi joq Qostanaı men Soltústik Qazaqstan oblystaryndaǵy aýyldardy aýyz sýmen jabdyqtaý negizinen toptyq sý qubyrlary esebinen júrgiziledi. Halyqqa sapaly sýmen jabdyqtaý qyzmetin kórsetý úshin tozyǵy jetken toptyq sý qubyrlaryn jańartý qajet», - dedi ol Májilistegi dóńgelek ústel barysynda.
Máselen, birinshi vıtse-mınıstrdiń aıtýynsha, Soltústik Qazaqstan oblysynyń birqatar aýylyn sýmen qamtyp otyrǵan toptyq sý qubyrlary 1961-1978 jyldary salynǵan jáne jańartýdy talap etedi. Al Mańǵystaý oblysynyń turǵyndary «Astrahan-Mańǵyshlaq» sý qubyrynyń jáne tuşytylǵan teńiz sýyn qoldanyp otyr. Al olardyń jıyntyq qýaty táýligine shamamen 150 myń tekshe metr ǵana.
«Jaz mezgilinde aýyz tý tapshylyǵy baıqalady jáne ol táýligine 51 myń tekshe metrdi quraıdy. Óńirdiń damý deńgeıin eskerer bolsaq, 2025 jylǵa qaraı sý qajettiligi táýligine 250-260 myń tekshe metrge jetedi. Bul máselerdi sheshý úshin aldyn ala boljamdy quny 247 mlrd teńgeden asatyn 9 sý tuşytý zaýytyn salýǵa baǵyttalǵan iri jobalardy júzege asyrý kózdelip otyr», - dedi Qaıyrbek Óskenbaev.
Kendirlide quny 87 mlrd teńge bolatyn sý tuşytý zaýyty salynady.
«Memleket basshysy 2024 jyldyń sońyna deıin Kendirlide táýliktiń qýaty 50 myń tekshe metr bolatyn sý tuşytý zaýyty qurylysyn aıaqtaýdy tapsyrdy. Osyǵan oraı, múddeli memlekettik organdarmen, Mańǵystý oblysynyń ákimdigimen jáne «Samuryq-Qazyna» AQ-pen birlesip atalǵan tapsyrmany oryndaý jóninde jol kartasyn ázirledik. Ázirlengen jol kartasyna sáıkes, qurylys-montaj jumystaryn 2022 jyldyń qarashasynda bastap, 2024 jyldyń jeltoqsanynda aıaqtaý josparlanǵan», - dedi ol Májilistegi dóńgelek ústel barysynda.
Onyń atap ótýinshe, jobaǵa «QazMunaıGaz» AQ tapsyrys berip otyr. Búginde tehnıkalyq-ekonomıkalyq negizdemege arnalǵan memlekettik saraptama qorytyndysy alynǵan. Qorytyndyǵa sáıkes, jobanyń jalpy quny 87,7 mlrd teńgeni quraıdy.
«Jobany jeke ınvestordyń qarajaty esebinen júzege asyrý kózdelgen. Qazirgi ýaqytta jobanyń áleýetti ınvestorymen kelissóz júrgizildi. Joba ýaqytyly aıaqtalady», - dedi birinshi vıtse-mınıstr.
«Kaspıı» sý tuşytý zaýytynyń qýatyn táýligine 40 myń tekshe metrge deıin keńeıtý jobasy júzege asyrylýda.
«Búginde mınıstrlik ákimdikpen birlesip, bıýdjettik baǵdarlamalar aıasynda Aqtaý qalasyndaǵy «Kaspıı» sý tuşytý zaýytynyń qýatyn táýligine 40 myń tekshe metrge deıin keńeıtý jobasyn júzege asyryp jatyr. Buǵan qosa, jeke ınvestorlar esebinen «Qarajanbas» ken ornynda qýaty 17 myń tekshe metr bolatyn sý tuşytý zaýytynyń qurylysyn aıaqtaý josparlanǵan», - dedi ol Májilistegi dóńgelek ústel barysynda.
Onyń atap ótýinshe, atalǵan jobalardy júzege asyrýdyń nátıjesinde «Astrahan-Mańǵyshlaq» sý qubyrymen qamtamasyz etilip otyrǵan Qaraqııa, Beıneý, Mańǵystaý aýdandary jáne Jańaózen qalasy turǵyndarynyń bir bóligi aýyz sýmen qosymsha qamtylatyn bolady.
