Qazaqstanda 892 búldirshin balabaqshamen qamtylǵan
NUR-SULTAN. QazAqparat – Qazirgi tańda Qazaqstanda mektepke deıingi uıymmen 892,2 myń bala, onyń ishinde jeke balabaqshamen 351,1 myń bala qamtylǵan, dep habarlaıdy QazAqparat.
«Qazirgi tańda Qazaqstanda mektepke deıingi uıymmen 892,2 myń bala, onyń ishinde jeke balabaqshamen 351,1 myń bala qamtylǵan. Memlekettik baǵdarlamaǵa sáıkes, bilim berýdiń barlyq deńgeıinde, sonyń ishinde mektepke deıingi tárbıeleý jáne bilim berý isinde de bilim qyzmetin alýshylardy tikeleı derbestendirilgen tártip boıynsha qarjylandyrýǵa kóshý kózdelgen», - delingen Premer-Mınıstr Asqar Mamın depýtattyq saýalǵa bergen jaýabynda.
Úkimet basshysynyń aıtýynsha, osyǵan baılanysty Bilim jáne ǵylym mınıstrligi memlekettik satyp alýdy jarııalaý tártibine ózgerister men tolyqtyrýlar engizgeli otyr.
«Naqtyraq aıtqanda mektepke deıingi uıymdarda memlekettik satyp alýdy jarııalaýda bul quqyqty ata-analarǵa berý josparlanǵan. Bul baǵyttaǵy qadam «ár balanyń óz qarajaty» qaǵıdatyn júzege asyrýǵa múmkindik beredi», - deıdi Úkimet basshysy.
Sonymen qatar, Asqar Mamın shyǵyndardyń jan basyna shaqqandaǵy normatıvin ınklıýzıvti bilim berý tártibine engizý máselesine qatysty aıtqan.
«Búgingi tańda bilim alýda erekshe qajettiligi bar balalardy tárbıeleý jáne oqytýǵa arnalǵan ádisteme men normatıvti qujattarǵa tıisti ózgerister men tolyqtyrýlar engizilgen», - dep atap ótedi Premer-Mınıstr.
