Qazaqstanda 89 myńnan astam azamattyq hal aktilerine ózgeris engizildi

«Azamattarǵa arnalǵan úkimet» memlekettik korporatsııasy 2023 jyly 89 myńnan astam azamattyq hal aktilerine ózgerister engizdi, dep habarlaıdy Kazinform.

Memlekettik korporatsııanyń baspasóz qyzmetinen málim etkenindeı, 2024 jyldyń qańtar aıynyń alǵashqy onkúndiginde ǵana 45 myń adam derekterdi jańartýǵa ótinish bildirgen.

Kóbinese qazaqstandyqtar otbasynyń quramyn rastaý jáne balalary týraly aqparatty engizý úshin túzetýler engizedi.

2024 jyldyń 1 qańtarynda Qazaqstan Respýblıkasynyń Prezıdenti Qasym-Jomart Toqaevtyń tapsyrmasy boıynsha «Ulttyq qor – balalarǵa» jobasy iske qosylǵany belgili.

Elimizdegi barlyq balalar baǵdarlamaǵa sáıkes jyl saıyn Ulttyq qordyń ınvestıtsııalyq kirisiniń bir bóligin alatyn bolady. Ata-analar, qorǵanshylar, qamqorshylar eGov.kz portalynda azamattyq hal aktilerindegi balalar týraly málimetterdi tekseredi.

«Aqparatty ózektendirý múddeli taraptyń ótinishi boıynsha júzege asyrylady. Tirkeý jazbasy «AHAT» aqparattyq júıesinde bolǵan jaǵdaıda qyzmetti berýshi tarap 2 jumys kúni ishinde ózgerister engizedi. Atalmysh aqparattyq júıede túzetýler úshin negiz bolatyndaı jazbalar bolmasa, qyzmet kórsetý merzimi 5 jumys kúnine deıin uzartylady.

Qosymsha aıta keter bolsaq, mańyzdy habarlamalar men áleýmettik qyzmetterdi ýaqtyly alý úshin memleketti otbasyńyzdyń quramy týraly habardar etý qajet. Tolyq jáne durys málimetter bazasynyń arqasynda, memleket búkil el jáne árbir aımaq boıynsha jeke, naqty demografııalyq málimetke ıe boldy. Bul ınfraqurylymdy – balabaqshalardy, mektepterdi, aýrýhanalardy damytýdy josparlaýǵa jáne ártúrli áleýmettik baǵdarlamalardy ázirleýge múmkindik beredi», dep habarlady vedomstvodan.

Eske sala keteıik, budan buryn qazaqstandyqtar 2023 jyly HQKO arqyly qansha tólqujat pen jeke kýálik alǵanyn jazǵan bolatynbyz.